Daniecki bajavik paćvierdziŭ rasstreły ŭ Słaviansku
Daradca lidara prarasijskich bajevikoŭ Ihara Strałkova, Ihar Druź, paćvierdziŭ u razmovie ź Bi-bi-si vypadki «rasstrełaŭ za ciažkija złačynstvy va ŭmovach nadzvyčajnaha stanovišča» na kantralavanych terytoryjach.
Pa słovach apałčenca, jaho paplečniki ŭpeŭnienyja ŭ pieramozie nad ukrainskim uradam, jaki jon nazvaŭ «kijeŭskimi terarystami».
Jak śćviardžaje Druź,
bajeviki-apałčency majuć namier pabudavać «sacyjalnuju dziaržavu», jakaja budzie abaraniać «chryścijanskija kaštoŭnaści» i karać «hramadskija zahany».
Daradca Strałkova nie sumniavajecca, što bolšaść «členaŭ apałčeńnia» padtrymlivaje ŭviadzieńnie śmiarotnaha pakarańnia za ciažkija złačynstvy.
Pradstaŭnik Ukrainy pry NATA Ihar Dałhoŭ u intervju Bi-bi-si zajaviŭ, što «Danieckaja narodnaja respublika» sama źjaŭlajecca terarystyčnaj arhanizacyjaj.
«Vy nazyvajecie hetaha čałavieka pradstaŭnikom dziaržavy. Heta nie dziaržava! Niepryznanaja Danieckaja narodnaja respublika — heta terarystyčnaja arhanizacyja, heta absalutna jasna. I tezisy, jakija my čujem ź jaje boku, — nie ich ŭłasnyja, jany pradyktavanyja Maskvoj», — prakamientavaŭ Dałhoŭ intervju z Druziem.
Pradstaŭnik ministra ŭnutranych spraŭ Ukrainy zajaviŭ Bi-bi-si, što kali paviedamleńni pra pazasudovyja zabojstvy paćvierdziacca, budzie raspačata kryminalnaja vytvorčaść.