Ukraina ušanavała pamiać achviar Haładamoru
Dvorniki ŭ Kijevie raznosili pa kvaterach śviečki, prapanujučy zapalić ich na padvakońni a 16-j. A prezydent Juščanka zaklikaŭ demantavać pomniki tatalitarnaha režymu.
24 listapada Ŭkraina ŭšanavała pamiać achviar Haładamoru -- štučnaha hoładu, vyklikanaha maskoŭskaju kamunistyčnaju uładaju u 1932—33 h. Sioleta Dzień pamiaci achviaraŭ haładamoraŭ dy palityčnych represij upieršyniu adznačaŭsia na ŭsioj terytoryi krainy.
Žałobnyja mierapryjemstvy u ramkach usieŭkrainskaj akcyi «Zapali śviečku!» adbylisia ŭ Sievastopali, Daniecku, Adesie, Charkavie, Vińnicy, Pałtavie, Łucku, Žytomiry, Lvovie, Ciarnopali, Dnieprapiatroŭsku dy ŭ inšych haradoch. Udzielniki paminalnych mitynhaŭ a 16-j, z nadychodam zmroku, zapalili śviečki, jakimi vykłali symbaličnyja kryžy na ziamli, a taksama ŭšanavali miljony zahinuŭšych ludziej chvilinaj maŭčańnia.
U Sievastopali była adkrytaja memaryjalnaja doška, a ŭ vioscy Kaminternaŭskaja na Adeščynie — memaryjalny kompleks pamiaci achviaraŭ Haładamoru. U Pałtavie dy Žytomiry śviatary roznych kanfesij adsłužyli panichidy pa ich. Śviečki byli zapalenyja taksama na šaści mastach praz raku Zbruč, što da 1939 h. była miažoj pamiž Zachodniaj i Centralnaj Ukrainaj, to bok pamiž Polščaju dy SSSR. Praz Zbruč zachodnieukrainskija sialanie pierapłaŭlali na płytach zbožža, kab uratavać ad śmierci ukraincaŭ z supraćlehłaha bierahu.
U Kijevie mitynh pamiaci adbyŭsia 24 listapada na Michajłaŭskaj płoščy, pobač z adzinym u stalicy nievialičkim pomnikam achviaram Haładamoru. Na mitynhu vystupiŭ prezydent Ukrainy Viktar Juščanka, jaki napiaredadni svaim ukazam abjaviŭ 2008 hodam pamiaci achviar Haładamoru. Juščanka sioleta zaklikaŭ demantavać pomniki tatalitarnaha režymu.
U Safijskim, Michajłaŭskim Załatavierchim saborach i ŭ inšych chramach Kijeva prajšli paminalnyja słužby. I siońnia, u paniadziełak, 26 listapada, kijaŭlanie zapalvajuć śviečki na Michajłaŭskaj płoščy.
Ranicaj 24 listapada dvorniki ŭ niekatorych rajonach Kijeva raznosili pa kvaterach śviečki, prapanujučy zapalić ich na padvakońni a 16-j. Viečaram u maim 45-kvaternym domie ŭ centry horadu śviečki hareli ŭ voknach troch kvater.