U Salihorsku z roźnicaj u try hadziny na adnym skryžavańni dvojčy źbili dziaciej
U Salihorsku z roźnicaj u try hadziny na adnym i tym ža skryžavańni ździejśnienyja dva najezdy na niepaŭnaletnich, paviedamiła starejšy inśpiektar pa asablivych daručeńniach UDAI MUS Hanna Banadyk.
Tak, 10 žniŭnia ŭ 15.10 miascovy žychar, jaki kiravaŭ biez paśviedčańnia kiroŭcy aŭtamabilem «Volva 940» pa vuł. Maładziožnaj z boku vuł. K. Zasłonava ŭ bok vuł. Kastryčnickaja (na skryžavańni vuł. Bahamołava — Maładziožnaj), ździejśniŭ najezd na 8-hadovaha chłopčyka. Dzicia pierasiakała prajeznuju častku na rovary pa nierehulavanym piešachodnym pierachodzie źleva naprava. Ź cialesnymi paškodžańniami chłopčyk špitalizavany ŭ traŭmatałahičnaje adździaleńnie Salihorskaj CRB.
U hety ž dzień 24-hadovaja miascovaja žycharka, kirujučy aŭtamabilem «BMV 525» pa vuł. Maładziožnaj z boku vuł. Kastryčnickaj u bok vuł. K. Zasłonava, na hetym skryžavańni ździejśniła najezd na 4-hadovuju dziaŭčynku. Jana pierasiakała prajeznuju častku razam z maci pa nierehulavanym piešachodnym pierachodzie źleva naprava. Dzicia ź cialesnymi paškodžańniami špitalizavana ŭ traŭmatałahičnaje adździaleńnie Salihorskaj CRB.
Hanna Banadyk adznačyła, što za siem miesiacaŭ biahučaha hoda z-za parušeńnia praviłaŭ prajezdu piešachodnaha pierachodu ździejśniena 291 DTZ, 54 ź ich źviazany z najezdami na dziaciej. U vyniku čaćviora niepaŭnaletnich zahinuli i 50 atrymali ranieńni. Usiaho z pačatku hoda ŭ darožna-transpartnych zdareńniach śmiarotna traŭmavanyja 20 niepaŭnaletnich, 237 dziaciej patrapili na balničnyja łožki z traŭmami. Za dva letnija miesiacy zahinuli 9 i atrymali ranieńni 90 dziaciej.