Bresckija pamiežniki adšukali hramadzianina Sierbii, jaki zhubiŭ 7,5 tys. jeŭra
Hramadzianin Sierbii pakinuŭ zapis u knizie zaŭvah i prapanoŭ z udziačnaściu vajskoŭcam Bresckaj Čyrvanaściažnaj pamiežnaj hrupy imia F.E.Dziaržynskaha za biezdakornaje vykanańnie słužbovych abaviazkaŭ i ŭvažlivaje staŭleńnie da tych, chto prajazdžaje praź miažu.
Pra heta paviedamiła aficer pres-słužby pamiežnaj hrupy Kaciaryna Paŭłava.
Vypadak z 45-hadovym turystam z Bałkanskaha paŭvostrava adbyŭsia ŭ mižnarodnym aŭtadarožnym punkcie propusku «Brest», kudy jon prybyŭ z dvuma suajčyńnikami na aŭtamabili. Paśla prachodžańnia pracedury pamiežnaha kantrolu vandroŭcy źjechali na polskuju terytoryju. Praź niekatory čas kantralor adździaleńnia pahraničnaha kantrolu «Varšaŭski most» znajšła na asfalcie adkrytuju sumku. Kab vyznačyć uładalnika, źmieściva sumki kamisijna ahledzieli ŭ słužbovym pamiaškańni. Tam byli znajdzienyja roznyja dakumienty na transpartny srodak, mabilny telefon, 7,5 tys. jeŭra i stary pašpart na imia hramadzianina Juhasłavii.
Bresckija pamiežniki apieratyŭna źviazalisia z polskimi kalehami i paviedamili im dadzienyja na čałavieka, što zhubiŭ rečy. Mienš čym praz paŭhadziny jon viarnuŭsia ŭ punkt propusku za svajoj majomaściu. Sierb byŭ kranuty dziejańniami biełaruskich pamiežnikaŭ. Asablivuju ŭdziačnaść žychar Sierbii vykazaŭ kantraloru adździaleńnia pahraničnaha kantrolu, jakaja znajšła jaho sumku z dakumientami i hrašyma.