Łukašenka: Naš unutrany rynak — naša ŭnutranaja sprava
Na ŭnutrany rynak Biełarusi nie paŭpłyvajuć rasijskija abmiežavańni na pastaŭki pradukcyi z Zachadu. Kiraŭnik dziaržavy Alaksandr Łukašenka i premjer-ministr Michaił Miaśnikovič 11 žniŭnia abmierkavali pytańni tranzitu ź inšych krain praź Biełaruś tavaraŭ na rasijskuju terytoryju.
«Što datyčycca našaha ŭnutranaha rynku, my [z Pucinym] asobna abmierkavali heta pytańnie. Heta naša ŭnutranaja sprava. Patrebny nam polskija jabłyki — my kuplajem, ale nie dla Rasii, a dla ŭnutranaha rynku. Patrebny niejkija niamieckija dalikatesy — taksama nabyvajem dla ŭnutranaha spažyvańnia. Treba nam niešta pierapracoŭvać — my kuplajem i pierapracoŭvajem», — skazaŭ Łukašenka.
Jon taksama padkreśliŭ, što «ŭ suviazi z hetym my pavinny być sumlennymi i, jak abiacali, vielmi prystojna pravodzić palityku ŭ adnosinach da Rasii».
Akramia taho, kiraŭnik dziaržavy źviarnuŭ uvahu Michaiła Miaśnikoviča na čerhi na hranicy i paprasiŭ uvažliva pastavicca da ludziej, jakija tam ciapier znachodziacca.
«Rašeńnie było ŭviedziena biez papiaredžańnia, niečakana. I na hranicy sabrałasia peŭnaja kolkaść aŭtamašyn, refryžerataraŭ, u tym liku z praduktami, jakija chutka psujucca. Nie treba hetych ludziej kryŭdzić. Pa-pieršaje, heta ž našy i rasijskija pieravozčyki - vadzicieli, ekśpiedytary. Pa-druhoje, tavar apłačany i zakantraktavany. Pa-treciaje, prosta nie pa-čałaviečy budzie, kali my da hetych ludziej nienarmalna pastavimsia», — ličyć Alaksandr Łukašenka.
Kiraŭnik dziaržavy skazaŭ, što papiaredziŭ staršyniu mytnaha kamiteta: «Dziejničać až da taho, što kali pastaŭščyk nakiroŭvaŭ u Rasiju tavar i jaho tam siońnia nie prymajuć, treba prapanavać jamu pradać na našaj terytoryi ci ž zabrać tavar dla pierapracoŭki. Heta značyć, tut treba vielmi akuratna pastupić i ŭ adnosinach da zachodnich pastaŭščykoŭ, kab my pa-čałaviečy vyjšli z hetaj situacyi. Ja dumaju, heta budzie nie na škodu Rasii. Heta nie supiarečyć abaviazacielstvam, jakija my ŭzhadnili».