Pieramovy pa Ukrainie skončylisia ničym
Łaŭroŭ trymaŭsia asobna
Pozna ŭviečary ŭ niadzielu ŭ Bierlinie zaviaršylisia pieramovy ministraŭ zamiežnych spraŭ Ukrainy, Rasii, Hiermanii i Francyi, pryśviečanyja ŭkrainskamu kryzisu.
Miarkujučy pa niešmatsłoŭnych kamientarach ich udzielnikaŭ, jany nie prynieśli kolki-niebudź istotnaha prahresu.
«Piać hadzin najskładanych pieramovaŭ. Ale, napeŭna, kab zrušyć ź miesca, treba šmat razoŭ pa piać hadzin», — napisaŭ u svaim «Tvitary» pa zakančeńni sustrečy kiraŭnik MZS Ukrainy Pavieł Klimkin.
Klimkin i jaho rasijski i francuzski kalehi Siarhiej Łaŭroŭ i Łaran Fabius pakinuli bierlinskuju viłu «Borzih», nie padyšoŭšy da prysutnych žurnalistaŭ.
Karotkuju zajavu dla presy zrabiŭ ministr zamiežnych spraŭ Hiermanii Frank-Valter Štajnmajer.
Jon nazvaŭ minułuju sustreču «nieabchodnymi pieramovami ŭ ciažki čas» i nadzieju na toje, što ich udzielnikam udałosia damahčysia «niekatoraha prahresu».
«My damovilisia, što dakładziem ab vynikach našaj sustrečy kiraŭnikam našych dziaržaŭ i ŭradaŭ i zatym - chutčej za ŭsio, da aŭtorka — vyznačym, jakim čynam praciahnuć našu siońniašniuju dyskusiju», — skazaŭ Štajnmajer.
«Našaj metaj zastajecca damahčysia spynieńnia ahniu va Ukrainie i praduchilić dalejšaje krovapralićcie», — padkreśliŭ kiraŭnik hiermanskaha MZS.
«Niama miesca kampramisu tam, dzie dziaržava vymušana pierasiekčy svaju «čyrvonuju liniju». Ukraina jaje nie pierajšła», - prakamientavaŭ u «Tvitary» vyniki sustrečy Pavieł Klimkin.