Rasija moža ŭvieści zabaronu na impart pramysłovych tavaraŭ
Sankcyi suprać ZŠA i ES mohuć nie abmiežavacca zabaronaj na impart praduktaŭ, Rasija moža ŭvieści abmiežavańni na ŭvoz pramysłovych tavaraŭ, raspaviali «Viedomostiam» dva fiederalnyja čynoŭniki.
Adpaviednyja prapanovy ŭrad užo nakiravaŭ prezidentu Uładzimiru Pucinu.
Pa słovach adnaho z čynoŭnikaŭ, kali ES i ZŠA ŭviali siektaralnyja sankcyi suprać Rasiei, urad praź niekalki dzion nakiravaŭ prezidentu dakład z šyrokim śpisam mahčymych sankcyj u adkaz, ale Pucin daručyŭ abmiežavać tolki impart praduktaŭ.
«Značyć, dadatkovyja sankcyi z boku Rasii mahčymyja, tolki kali ES i ZŠA uviaduć svaje sankcyi suprać nas», — miarkuje čynoŭnik. Inšy čynoŭnik kaža, što va ŭrada pakul niama daručeńnia prezidenta rychtavać dakumienty ab uviadzieńni novych sankcyj.
Adna z mahčymych sankcyj — poŭnaja ci amal poŭnaja zabarona impartu aŭtamabilaŭ ź niedružalubnych krain, kaža fiederalny čynoŭnik.
Pavodle jaho słoŭ, popyt moža być zabiaśpiečany za košt ŭnutranaj vytvorčaści, pierš za ŭsio pradpryjemstvaŭ, jakija pracujuć u režymie pramysłovaj zborki.
Pa dadzienych «ASM-chołdynhu», u pieršym paŭhodździ 2014 dola uviezienych lehkavych aŭtamabilaŭ na rasijskim rynku skłała 27%, hruzavikoŭ (uklučajučy hruzavyja viersii LCV) - 46%, aŭtobusaŭ (uklučajučy pasažyrskija viersii LCV) - 13%. Zabarona na impart aŭtamabilaŭ ź Jeŭropy, ZŠA i niekatorych inšych krain pryviadzie da pieradziełu rynku i vyjhrajuć tyja, u kaho jość vytvorčaść u Rasii (a jaje naładzili ŭsie najbujniejšyja hłabalnyja aŭtakancerny).
Mahčyma abmiežavańnie na impart miedycynskich vyrabaŭ, ale pytańnie adčuvalnaje i patrabuje dadatkovaha abmierkavańnia, kaža fiederalny čynoŭnik.
Siarod miedvyrabaŭ, jakija vypuskajucca ŭ Rasii, - survetki, płastyry, chirurhičnaje i prostaje dyjahnastyčnaje abstalavańnie, ale heta tolki 20% rynku, adznačaje pradstaŭnik SCA Jaŭhien Macharotaŭ: «Astatniaje - u tym liku vysokatechnałahičnaje abstalavańnie — heta impart. Kali na jaho ŭvoz buduć uviedzieny abmiežavańni, to ŭ našaj krainie prosta nielha budzie chvareć».