U DNR aficyjna ŭviali śmiarotnaje pakarańnie
Prezidyum savieta ministraŭ samaabvieščanaj «Danieckaj narodnaj respubliki» uvioŭ śmiarotnaje pakarańnie, paviedamlajecca na sajcie pres-centra «DNR».
Členy prezidyuma zaćvierdzili pałažeńnie «Ab vajennych sudach «Danieckaj narodnaj respubliki», a taksama «Kryminalny kodeks» Danieckaj narodnaj respubliki».
«Nie sakret, što ŭ nas jość vajskoŭcy, jakija ździajśniajuć złačynstvy. Isnujuć fakty maradziorstva, užyvańnia hvałtu. Tamu stvareńnie orhanaŭ vajennaj justycyi pavinna być adnoj ź pieršačarhovych zadač», - pryvodziacca ŭ paviedamleńni słovy v.a. hienieralnaha prakurora «DNR» Eduarda Jakuboŭskaha.
Pry raspracoŭcy KK «DNR» za asnovu ŭziali narmatyŭnuju bazu Rasijskaj Fiederacyi, adznačaje pres-centr «respubliki», zakanadaŭčy akt «praduhledžvaje śmiarotnaje pakarańnie za asabliva ciažkija złačynstvy».
Pieršy vice-premjer «DNR» Uładzimir Anciufiejeŭ padkreśliŭ, što ŭviadzieńnie śmiarotnaha pakarańnia
— heta «nie pomsta, a vyšejšaja stupień sacyjalnaj abarony».
«My pavinny stać na bok paciarpiełaha, na bok jahonych rodnych. My abaviazany abaranić narod», — zajaviŭ jon.
U kancy maja ŭ ŚMI i błohach źjaviłasia fatahrafija zahadu, nibyta padpisanaha kamandziram apałčeńnia Danbasa Iharam Strałkovym, zhodna ź jakim dvoje padparadkavanych jamu kamandziraŭ byli rasstralanyja za maradziorstva i inšyja złačynstvy.