Termin davańnia ŭkraincam statusu biežanca ŭ Biełarusi moža być skaročany
Biełaruś razhladaje mahčymaść skaračeńnia terminu pryniaćcia rašeńnia ab davańni statusu biežanca dla hramadzian Ukrainy, paviedamiŭ biełaruski pasoł Valancin Vialička 18 žniŭnia na pres-kanfierencyi ŭ Kijevie.
Siamja z Horłaŭki pryjechała ŭ Maładziečanski rajon, paśla taho jak ich adfutbolili ŭ Rasii. Fota Kraj.by
Jak paviedamlaje RIA Novosti, pasoł adznačyŭ, što dakumienty ab davańni statusu biežanca zvyčajna razhladajucca na praciahu šaści miesiacaŭ, ale dla prybyŭšych z Łuhanskaj i Danieckaj abłaściej hety termin, mahčyma, budzie skaročany da troch miesiacaŭ.
Pavodle słoŭ Vialički, za apošnija miesiacy ŭ Biełaruś vyjechała prykładna 26 tysiač hramadzian Ukrainy, kala 500 čałaviek źviarnulisia pa status biežanca.
Kala paŭtary tysiačy ŭkraincaŭ majuć vid na pastajannaje žycharstva ŭ Biełarusi, što daje im mahčymaść pracavać i zabiaśpiečyć siabie žyllom, paviedamiŭ pasoł. Jašče bolš za 3 tysiačy zajavak ciapier znachodzicca na razhladzie.
«Ciapier my taksama majem šmat zvarotaŭ ab tym, kab pradoŭžyć vučobu ŭ Biełarusi, asabliva ad tych, chto pryjechaŭ z zony bajavych dziejańniaŭ», — dadaŭ kiraŭnik biełaruskaha dyppradstaŭnictva ŭ Kijevie.
Vialička padkreśliŭ, što Biełaruś pa-raniejšamu vystupaje za terytaryjalnuju cełasnaść Ukrainy i vyrašeńnie kanfliktu na ŭschodzie krainy šlacham pieramoŭ. «Naša pazicyja niaźmiennaja: niama nijakaj fiederalizacyi, jość cełasnaść Ukrainy. Druhoje: usie pytańni pavinny vyrašacca praź pieramoŭny mirny šlach», — skazaŭ pasoł.
Jon taksama zapeŭniŭ, što z boku Biełarusi nie budzie vajennaj ahresii adnosna Ukrainy.
«Ja chaču skazać słovami kiraŭnika dziaržavy: nikoli z boku Biełarusi i trecich krain nie budzie ahresii», — zajaviŭ biełaruski dypłamat.
Nahadajem, raniej Alaksandr Łukašenka zajaŭlaŭ pra nieabchodnaść zachavać Ukrainu adzinaj i cełasnaj dziaržavaj. «Nielha ŭ hetaj mituśni i błytaninie pravodzić niejkija refierendumy ab fiederalizacyi i inšaje. Heta ŭsio budzie nieabjektyŭna, heta daść padstavu havaryć, što jany nielehitymnyja, i budzie viečna stajać pytańnie ab pryznańni i niepryznańni hetaha refierendumu», — havaryŭ Łukašenka ŭ kancy sakavika ŭ intervju ŭkrainskaj prahramie «Šuster live».