Hurt «Krama» znoŭ apynuŭsia pad zabaronaj?
Muzykam nie dazvolili vystupać na fiestyvali «Noč Kažanoŭ» u «Dudutkach».
23 žniŭnia ŭ «Dudutkach» płanujecca pieršy fiestyval «Noč kažanoŭ», jaki arhanizuje HA «Achova ptušak Baćkaŭščyny». Aproč tematyčnych zabavaŭ i aktyŭnaściaŭ płanavałasia, što na feście vystupić hurt «Krama», ale niečakana źjaŭleńnie muzykaŭ na scenie muziejnaha kompleksa apynułasia niepažadanym.
«Mnie tolki što patelefanavaŭ čałaviek, ź jakim ja damaŭlaŭsia, i skazaŭ što nam zabaranili vystupać, — kamientuje Ihar Varaškievič. — Maŭlaŭ, dyrektara «Dudutak» kudyści vyklikali i skazali, kab nijakaj «Kramy» nie było. Takaja voś cikavaja historyja napiaredadni prezientacyi novaha alboma. Ciapier nie viedaju, što rabić. Pryčym, u nas tam usio aficyjna było: ź pieraličeńniami hrošaj, z vypłatami padatkaŭ. Voś i ŭźnikaje pytańnie, a jak ža tady zarablać hrošy? Za što žyć? Mnie piensiju płacić nichto nie budzie!»
Dyrektar «Dudutak» Siarhiej Dziukaraŭ lubyja zabarony ci ŭłasnuju nieluboŭ da hurta admaŭlaje. Tym bolš, muzyki ŭžo vystupali ŭ muziejnym kompleksie i nijakich pytańniaŭ z hetym nie ŭźnikała.
«Heta nie majo mierapryjemstva, — ździŭlajecca Siarhiej Uładzimiravič. — U mianie prosta zdymajuć placoŭku pad svajo mierapryjemstva. Nakolki mnie viadoma, u ich uźnikli peŭnyja finansavyja pytańni. A taksama arhanizacyjnyja pa prahramie. Tamu, ja dumaju, ni pra jakija zabarony ci niešta padobnaje havorki nie viadziecca».
HA «Achova ptušak Baćkaŭščyny» kamientavać situacyju nie žadaje. Maŭlaŭ, meta mierapryjemstva — papularyzacyja kažanoŭ, a hurt «Krama» płanavaŭsia tolki jak adzin sa składnikaŭ fiestyvalu.
«Tamu lubyja kamientaryi na hetuju temu mohuć pastavić usio mierapryjemstva pad pahrozu, — reziumujuć u Hramadskim abjadnańni. —Siońnia my ŭžo ŭ śpiešnym paradku viadziem pieramovy z hurtami Recha dy The Apples. To bok, ciapier u nas vystupiać dva kalektyvy».
***
Pačatak mierapryjemstva 16:00. Košt — uvachodny kvitok u muziej (darosły — 100 000 rub, dziciačy — 60 000, daškolniki — biaspłatna). Daviedki ŭ muziejnym kompleksie «Dudutki» — (29)6025250, (29)6035250, HA «Achova ptušak Baćkaŭščyny» — (17)2630613, (29)2230613, (29)1016887.