Data čarhovaj sustrečy kantaktnaj hrupy pa Ukrainie nieviadomaja
Na hety čas data nastupnaj sustrečy kantaktnaj hrupy pa Ukrainie ŭ Minsku nieviadomaja, paviedamiŭ siońnia na bryfinhu pres-sakratar MZS Biełarusi Dźmitryj Mirončyk.
Jon adznačyŭ, što biełaruski bok nieadnojčy arhanizoŭvaŭ sustrečy hrupy ŭ Minsku, ale rašeńnie pravieści čarhovuju sustreču prymajuć udzielniki hrupy. Kali takoje rašeńnie budzie pryniataje, biełaruski bok hatovy arhanizavać umovy dla pieramoŭ, padkreśliŭ Mirončyk. «Ciapier ad bakoŭ, pradstaŭlenych u kantaktnaj hrupie, da nas nie pastupała adpaviednaj infarmacyi», — dadaŭ pres-sakratar MZS.
Nahadajem, na papiarednim pasiadžeńni kantaktnaj hrupy pa ŭrehulavańni ŭkrainskaha kryzisu, jakoje prajšło ŭ Minsku 5 vieraśnia, pradstaŭnik aficyjnaha Kijeva i samaabvieščanych Danieckaj i Łuhanskaj narodnych respublik dasiahnuli šerahu damoŭlenaściaŭ. Asnoŭnyja pałažeńni pieramirja ŭstanaŭlivajuć spynieńnie bajavych dziejańniaŭ i abmien pałonnymi. Tady ž udzielniki sustrečy damovilisia sabracca praz 7-8 dzion (heta značyć, u kancy hetaha tydnia).
Ułady Ukrainy na pieramovach pradstaŭlaŭ eks-prezident krainy Leanid Kučma, Rasiju — pasoł RF va Ukrainie Michaił Zurabaŭ, sieparatystaŭ Danbasa — premjer i vice-premjer DNR Alaksandr Zacharčanka i Andrej Purhin, a taksama premjer i kiraŭnik parłamienta ŁNR Ihar Płotnicki i Alaksiej Karakin. Ad ABSIE na sustrečy prysutničała aficyjny pradstaŭnik dziejnaha staršyni ABSIE pa pytańniach urehulavańnia situacyi va Ukrainie Chajdzi Taljavini.