Bloomberg: ZŠA i ES hatovyja zabaranić inviestavańnie ŭ hłybakavodnuju i słancavuju hieołahavyviedku ŭ Rasiei
Sankcyi mohuć zrabić na rasijskuju ekanomiku hłybiejšaje ŭździejańnie, čym mierkavałasia raniej, piša ahienctva finansavych navin Bloomberg.
«Sa słovaŭ troch amerykanskich čynoŭnikaŭ (jany pažadali zastacca ananimnymi, bo ab hetych zachadach nie abvieščana publična), novyja sankcyi dziela Ukrainy zabaroniać supracoŭnictva z ZŠA i ES pry pošukach nafty ŭ rasiejskaj Arktycy, u hłybakavodnych rajonach i słancavych pakładach. Kali hetyja sankcyi buduć uviedzienyja ŭ siłu, jany zakranuć kampanii ad Dałasa da Łondana, u tym liku Exxon Mobil Corp. i BP Plc.», — havorycca ŭ artykule.
Amierykanskija čynoŭniki zajavili: jak tolki ES uviadzie ŭ siłu novuju zabaronu na pieradaču Rasiei enerhietyčnych technałohij i pasłuh, ZŠA zrobiać anałahična i ŭviaduć taki samy pakiet sankcyj, u tym liku zabaronu na ekspart amerykanskaha abstalavańnia i technałohij, jakija patrebnyja dla śpiecyjalizavanaj hieołahavyviedki. Sa słoŭ čynoŭnikaŭ, rasiejcy nie majuć abstalavańnia dla samastojnaha praviadzieńnia takoj hieołahavyviedki.
«Sa słovaŭ dvuch jeŭrapiejskich čynoŭnikaŭ, jakija taksama vykazalisia na ŭmovach ananimnaści, 8 vieraśnia ŭrady JEZ damovilisia pra hetyja sankcyi, źviazanyja z naftaj, u ramkach bolš šyrokaha pakieta zachadaŭ, jakija zaklikanyja zabrytać finansavuju, abaronnuju i enerhietyčnuju industryi Rasiei. Ciapier čakajecca pastanova ab acency spynieńnia ahniu, abvieščanaha va Ukrainie», — havorycca ŭ artykule.
Pavodle źviestak vydańnia, dadatkovyja sankcyi nie pieraškodziać śvidravańniu tradycyjnych naziemnych śvidravin i śvidravin na płytkavodździ va ŭnutranych morach, a taksama zdabyčy nafty na takich śvidravinach. «Sankcyi nakiravanyja na bałansavyja zapasy, jakija patencyjna pačnuć pastaŭlać naftu na suśvietnyja rynki tolki praz 5—10 hadoŭ», — tłumačać aŭtary.
«Kali praŭda, što novyja sankcyi zabaroniać technałohii i pasłuhi dla vyviedki ŭ Arktycy, hłybakavodnych rajonach i słancavych pakładach, heta budzie vielmi surjozna», — prakamentavaŭ Džejsan Bordaf, u minułym daradca Abamy ŭ enerhietycy. «Heta značna abmiažuje mahčymaści Rasiei ŭ zdabyčy nafty ŭ budučyni. Praŭda, važna adznačyć: kab takija sankcyi byli dziejsnyja, spatrebicca ščylnaje supracoŭnictva Jeŭropy i ZŠA», — dadaŭ jon.
ZŠA nie majuć namieru zrabić vyniatki dla ŭžo padpisanych kantraktaŭ, ale amierykanskija čynoŭniki nie ŭpeŭnienyja, ci prajavić ES takuju ž paśladoŭnaść.
Sankcyi zabaroniać amerykanskim i jeŭrapiejskim kampanijam pryvozić u Rasieju śpiecyjalistaŭ i bryhady śvidroŭščykaŭ, adznačyli čynoŭniki.
Zabarona likviduje ščyliny ŭ papiarednich pakietach sankcyj. «Praz hetyja ščyliny hrupa z Seadrill Ltd. (SDRL), zarehistravanaja na Biermudach, u kancy lipienia pryviała ŭ rasiejskija vody płyvučuju śvidravalnuju płatformu West Alpha na daručeńnie Exxon Mobil i «Rośniefti», — piša hazeta.
Prybyćcio śvidravalnaj płatformy i padpisańnie šaści novych kantraktaŭ Seadrill z «Rośniefťju» 29 lipienia raźjušyła aficyjnych asob ZŠA i ES. «Ź ichnych słoŭ, hetyja kroki išli nasupierak metam ekanamičnych abmiežavańniaŭ — zamarožvańniu rasiejskaj hieołahavyviedki ŭ Arktycy», — havorycca ŭ artykule.
Mahčyma, pad pytańniem akazalisia niekatoryja z samych darahich i składanych śvidravin, u tym liku śvidravina koštam 700 młn dalaraŭ, jakuju Exxon i «Rośniefť» pačali śvidravać u žniŭni ŭ Karskim mory.
Dla amierykanskaj Exxon dziejnaść u Rasiei — heta samyja vialikija perspektyvy na zdabyču za miežami ZŠA. Kiraŭnik Exxon Reks Tylersan u mai vykazvaŭ sumnieńni, što sankcyi ŭ dačynieńni da Rasiei buduć dziejsnyja. U červieni jon źjaviŭsia na scenie na Suśvietnym naftavym kanhresie ŭ Maskvie ŭ pary z kiraŭnikom «Rośniefti» Iharam Siečynym, jaki trapiŭ u sankcyjny śpis ZŠA.
Na dumku vydańnia, uraźlivaja taksama niderłandskaja Royal Dutch Shell, jakaja inviestuje ŭ adnaŭleńnie i pavieličeńnie abjomaŭ zdabyčy nafty ŭ Rasiei na starych radoviščach, a taksama ŭ vyviedku «niekatorych ź vielizarnych, niekranutych pakładaŭ słancavaj nafty».
Brytanskaja BP vałodaje 19,75% akcyj «Rośniefti». «Heta najbujniejšaja pramaja zamiežnaja inviestycyja ŭ Rasieju», — paviedamlaje Bloomberg.
U Rasiei taksama jość kantrakty z takimi viadomymi jeŭrapiejskimi kampanijami, jak francuzskaja Total i narviežskaja Statoil.
Na rasiejskija śvidraviny prypadajuć amal 10% nafty, jakaja zdabyvajecca Total va ŭsim śviecie.
U žniŭni kiraŭnik Statoil Chelhie Łund zajaviŭ, što isnyja sankcyi adterminujuć niekatoryja supolnyja prajekty z «Rośniefťju».