U Zasłaŭi admianili vystavu pra Zachodniuju Biełaruś i 1939 hod
Vystava «Zachodniebiełaruskaja Atłantyda. Historyja Zachodniaj Biełarusi ŭ mižvajenny čas u dakumientach, fotazdymkach i artefaktach» mieła adčynicca siońnia.
Hałoŭnaja ideja vystavy była pakazać Vieraśnioŭskuju kampaniju 1939 hoda, u jakoj udzielničali złučeńni Vojska Polskaha, u składzie jakich była značnaja kolkaść uradžencaŭ Zachodniaj Biełarusi.
Akramia taho na vystavie płanavałasia pakazać i mirnaje žyćcio Zachodniaj Biełarusi ŭ 1921–1939 hadach praz aryhinalnyja fotazdymki, dakumienty i rečy taho času. Naviedvalniki muzieja zmahli b ubačyć taksama formy aficiera Vojska Polskaha, žaŭniera piachotnaha pałka i maraka Pinskaj račnoj fłatylii. Usiaho ŭ ekspazicyi było 300 pradmietaŭ, bolšaja častka ź jakich aryhinały.
Usie hetyja rečy sabraŭ historyk Ihar Mielnikaŭ.
Ale vystava nie adkryłasia.
Rusłan Truchan, načalnik Hałoŭnaha ŭpraŭleńnia ideałahičnaj raboty, kultury i pa spravach moładzi Minabłvykankama, paličyŭ, što vystava prynižaje rolu SSSR, pravapierajemnicaj jakoha źjaŭlajecca Biełaruś, a značyć prynižaje i rolu Biełarusi.
Čynoŭnik (u niadaŭnim minułym hałoŭny brsmaviec Minskaj vobłaści) nie hladzieŭ ekspanataŭ, a skłaŭ svajo mierkavańnie pa publikacyjach u internecie. Jon rekamiendavaŭ dyrektaru muziejnaha kompleksu «Zasłaŭje» Mikałaju Pahranoŭskamu nie adčyniać vystavu.
«Vystava rychtavałasia amal paŭhoda. Jaje hałoŭnaja ideja — pakazać mužnaść biełaruskich žaŭnieraŭ polskaj armii, jakija pieršymi ŭ Jeŭropie, razam z palakami, skazali Hitleru «nie». U vieraśni 1939 hoda jany zrabili krok da pieramohi ŭ mai 1945 hoda.
Sučasnym biełaruskim dziaržaŭnym ideołaham hetaja staronka našaj historyi padajecca nie cikavaj, — miarkuje Mielnikaŭ. — Jany ličać, što biełarusy zmahalisia z nacyzmam tolki ŭ mundzirach savieckaj armii».
Mielnikaŭ ličyć takuju paziciju dziŭnaj i navat durnoj. Jon spadziajecca, što ŭsio ž znojdziecca inšaja mahčymaść paznajomić amataraŭ historyi z kalekcyjaj.