Papiarovyja karony i čornyja stužki na Kastryčnickaj płoščy
Niahledziačy na žorstkaje blakavańnie centru stalicy padčas cyrymonii inaŭhuracyi Alaksandra Łukašenki, asobnym hrupam moładzi ŭdałosia pravieści symbaličnyja akcyi pratestu ŭ centry Miensku. Najbujniejšaj ź ich stała naviazvańnie ludźmi čornych stužak na słupy, balustrady j drevy ŭ centry. Takich stužak za dzień źjavilisia sotni, i orhany pravaparadku zdymali ich ciaham dnia i nočy z 8 na 9 krasavika.
Z troch punktaŭ u centry stalicy byli zapuščanyja ŭ nieba čornyja baloniki.
Chto moh, pranosiŭ takija šaryki i na Płošču.
Inšaja hrupa moładzi praniesła praz barjery, na jakich abšukvali ludziej na padychodach da centru, papiarovyja karony, i nadzieła ich na hałovy na płoščy. Abyšłosia biez zatrymańniaŭ. Achoŭniki paradku mieli zahad adbirać “kamprametujučyja pradmiety”, ale nia mieli zahadu zatrymlivać ludziej, tamu paśla pravierki dakumentaŭ usich adpuskali.
Fłeš-mob adbyŭsia na paštamcie. Niekalki dziasiatkaŭ čałaviek adpravili na imia A.Łukašenki telehramy: “Vaša śviaciejšastva. Vinšujem ź inaŭhuracyjaj”.
Prachody da Kastryčnickaj płoščy byli blakavanyja milicyjaj, jakaja ŭranku puskała ludziej tolki pa specprapuskach, a ŭviečary — paśla vobšuku. Ruch u centry horadu ŭdzień byŭ spynieny, ciahniki metro na stancyi Kastryčnickaj nie spynialisia.
Skver Janki Kupały, dzie chacieli sabracca pradstaŭniki inicyjatyvy “Razam”, kab vykazać pratest suprać inaŭhuracyi, pieraryty nibyta dla ramontu darožak i začynieny dla naviednikaŭ.
* * *
Akcyi pratestu prajšli i ŭ inšych haradach. Tak, adrazu dva fłeš-moby, pryśviečanyja inaŭhuracyi Alaksandra Łukašenki i patrabavańnia Rasiei addać "Biełtranshaz" va ŭłasnaść «Hazpromu», praviała moładź u Bieraści. A ŭ Śvietłahorsku aktyvisty adznačali novy termin prezydenta raspaŭsiudam 10 tysiač ulotak «Nie narod dla ŭradu, a ŭrad dla narodu».
* * *
Biełarusy-emihranty praviali teatralizavanyja akcyi pratestu suprać A.Łukašenki ŭ Varšavie, Kijevie, Prazie.
* * *
Inaŭhuracyju A.Łukašenki tranślavali pa ŭsich nacyjanalnych telekanałach. Jana była zrežyseravanaja ź vieličču. Spačatku niekalki chvilinaŭ pakazvali, jak imčaŭ mersedes A. Łukašenki ŭ supravadžeńni achovy i matacyklistaŭ ŭ Pałac Respubliki, jak paźniej jon adzin išoŭ 200 metraŭ pa čyrvonym dyvanie.
U Pałacy respubliki, paśla taho, jak Lidzija Jarmošyna abviaściła vyniki vybaraŭ, A.Łukašenka pa-biełarusku začytaŭ tekst prysiahi: “Zastupajučy na pasadu prezydenta Respubliki Biełaruś, uračysta klanusia vierna słužyć narodu Respubliki, pavažać i achoŭvać pravy i svabody čałavieka i hramadzianina, zachoŭvać i abaraniać Kanstytucyju Respubliki Biełaruś, śviata i dobrasumlenna vykonvać uskładzienyja na mianie vysokija abaviazki”.
Vyhladaŭ A. Łukašenka krychu stomlena, napružańnie vydavali j miachi pad vačyma. Kali zaśpiavali himn, jon maŭčaŭ, ściskajučy kułaki. Łukašenku pavinšavali ź inaŭhuracyjaj staršynia Savietu Respubliki Hienadź Navicki, kiraŭnik Kanstytucyjnaha Sudu Hieorhij Vasilevič, mitrapalit Fiłaret, jakija stajali na scenie.
Alaksandar Łukašenka vystupiŭ z prahramnaj pramovaj, u jakoj zajaviŭ, što budzie prytrymlivacca toj stratehii, jakoj kiravaŭsia 10 hadoŭ.
Paśla hetaha jon pieraapranuŭsia ŭ maršalski mundzir i pryniaŭ prysiahu vojskaŭ.
* * *
20 siabroŭ Kanservatyŭna-chryścijanskaj partyi BNF, zatrymanych napiaredadni, čakajuć sudu ŭ pryjomniku-raźmierkavalniku na Akreścina.
Naš kar., www.svaboda.org, minsk_news