U adnym ź dziciačych sadoŭ Hrodna pamierła trochhadovaja dziaŭčynka
U adnoj ź dziciačych daškolnych ustanoŭ Leninskaha rajona Hrodna 26 vieraśnia raptam pamierła 3-hadovaje dzicia. Pra heta paviedamlaje sajt izgrodno.com.
Pavodle infarmacyi resursu, vychavalnik pačała budzić dziaciej paśla cichaj hadziny i adno dzicia nie pračnułasia.
Vyklikali chutkuju dapamohu, u miedpunkcie nieadkładna pačali pravodzić reanimacyjnyja mierapryjemstvy. Niahledziačy na chutkaje prybyćcio daktaroŭ, vyratavać dzicia nie ŭdałosia. Da poźniaha viečara ŭ sadku pracavali pradstaŭniki milicyi i Śledčaha kamiteta.
Papiaredni dyjahnaz — «sindrom dziciačaj raptoŭnaj śmierci».
Fakt śmierci małaletniaha dziciaci ŭ dziciačym sadzie paćvierdzili va USK pa Hrodzienskaj vobłaści.
Śledčymi ŭ chodzie ahladu bačnych cialesnych paškodžańniaŭ na ciele dziaŭčynki vyjaŭlena nie było, pieradaje BiełaPAN.
Dla ŭstanaŭleńnia pryčyny śmierci pryznačana sudova-miedycynskaja ekśpiertyza, vykanańnie jakoj arhanizavana abłasnym upraŭleńniem Dziaržkamiteta sudovych ekśpiertyz.
Śledčymi kanfiskavana i vyvučajecca dakumientacyja, jakaja rehłamientuje ŭnutrany rasparadak dziciačaj daškolnaj ustanovy. Pravodziacca apytańni rabotnikaŭ jaślaŭ-sada i svajakoŭ dziaŭčynki, inšyja śledčyja dziejańni. Pavodle papiarednich dadzienych, napiaredadni śmierci dzicia pavodziła siabie naturalnym čynam, skarhaŭ na stan zdaroŭja nie vykazvała.