«DNR» zajaviła pra pačatak nastupu na ŭkrainskija pazicyi
Gazeta.ua
«Premjer-ministr» samaabvieščanaj Danieckaj narodnaj respubliki Alaksandr Zacharčanka abviaściŭ pra pačatak nastupu «apałčencaŭ» na pazicyi ŭkrainskich siłavikoŭ.
Pavodle jaho słoŭ, bajavyja dziejańni adnoŭlenyja ŭ suviazi z tym, što Kijeŭ nie vykonvaje «režym cišyni» na ŭschodzie Ukrainy.
«Režym cišyni vykonvajecca tolki nami. Z pazaŭčorašniaha dnia i my pačali adkazvać. Učora i siońnia stała cišej», — zajaviŭ Zacharčanka.
Pry hetym «premjer» DNR nie vyklučyŭ pačatku ciažkich bajavych dziejańniaŭ u suviazi z płanami «sieparatystaŭ» viarnuć sabie kantrol nad šeraham haradoŭ Danbasa. Pa słovach Zacharčanki, u ich liku Kramatorsk, Maryupal i Słaviansk.
«Kramatorsk, Maryupal i Słaviansk — jany buduć našy. My majem namier ich zabrać, viarnuć sabie. Tak što nie vyklučany jašče ciažkija bajavyja dziejańni», — padkreśliŭ jon.
U pačatku vieraśnia pamiž pradstaŭnikami samaabvieščanych «Danieckaj» i «Łuhanskaj narodnych respublik» z adnaho boku, i ŭkrainskimi ŭładami - z druhoha, było składziena pieramirje. Akramia taho, byŭ uzhodnieny płan mirnaha ŭrehulavańnia kanfliktu. U pryvatnaści, Kijeŭ pryniaŭ zakony ab asablivym statusie častki Danbasa i amnistyi dla «apałčencaŭ».