Vadziciel, jaki naśmierć źbiŭ supracoŭnika DAI ŭ Minsku, pryhavorany da siami hadoŭ kałonii
Sudom Pieršamajskaha rajona Minska 27 kastryčnika vyniesieny pryhavor vadzicielu, jaki źbiŭ nočču 21 maja na praśpiekcie Niezaležnaści ŭ Minsku supracoŭnika DAI. Milicyjanier zahinuŭ na miescy.
28-hadovy žychar pasiołka Kałodziščy Minskaha rajona pryhavorany da siami hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach uzmocnienaha režymu z prymusovym lačeńniem ad ałkahalizmu. Jon taksama pazbaŭleny prava kiravańnia transpartnymi srodkami na piać hadoŭ. Pa rašeńni suda abvinavačvany abaviazany vypłacić u jakaści kampiensavańnia maralnaha ŭronu pa 100 młn. rubloŭ baćkam zahinułaha i pa 50 młn. rubloŭ dźvium jaho siostram. Pryhavor moža być abskardžany.
Nahadajem, vadziciel raniej vosiem razoŭ sudzimy za ŭčynieńnie naŭmysnych złačynstvaŭ. Jamu inkryminavałasia kiravańnie transpartnym srodkam u stanie ałkaholnaha apjanieńnia (č. 2 ar. 317-1 KK), kradziež transpartnaha srodku (č. 1 art. 214 KK), parušeńnie praviłaŭ darožnaha ruchu asobaj, jakaja kiruje transpartnym srodkam u stanie ałkaholnaha apjanieńnia, što mieła vynikam pa nieaściarožnaści śmierć čałavieka (supracoŭnika DAI) (č. 4 art. 317 KK), a taksama ŭchileńnie ad pakarańnia ŭ vyhladzie štrafu (art. 418 KK), uchileńnie ad vykanańnia pryhavoru suda ab pazbaŭleńni prava zajmacca peŭnaj dziejnaściu (art. 417 KK).
21 maja kala hadziny nočy na praśpiekcie Niezaležnaści ŭ Minsku aŭtamabilem «Fijat» byŭ učynieny najezd na inśpiektara darožna-patrulnaj słužby pry ažyćciaŭleńni im słužbovych abaviazkaŭ. Supracoŭnik milicyi ad atrymanych paškodžańniaŭ pamior na miescy. Vadziciel ź miesca zdareńnia ŭciok, ale chutka byŭ zatrymany.
Ustanoŭlena, što «Fijat», jakim kiravaŭ abvinavačvany, byŭ im ukradzieny ŭ toj ža viečar niezadoŭha da zdareńnia. Śledčyja dakładny vyvučyli i adnavili padziei taho viečara. Praviedzieny šerah składanych ekśpiertyz. Akazałasia, što na momant učynieńnia DTZ mužčyna znachodziŭsia ŭ stanie mocnaha ałkaholnaha apjanieńnia (2,75 pramile ałkaholu), pieravysiŭ ustanoŭlenuju na hetym učastku chutkaść, byŭ pazbaŭleny prava kiravańnia transpartnym srodkam na piać hadoŭ.