Fłešmob: pradekłamuj na kamieru lubimyja tvory i pieradaj estafietu siabram
Płatforma «Litara-A», što papularyzuje biełaruskuju litaraturu praź videaroliki, vyrašyła kinuć vyklik karystalnikam sacyjalnych sietak. Stvaralniki płatformy prosiać ludziej dekłamavać na kamieru lubimyja tvory i pieradavać estafietu trom svaim siabram. Takim čynam inicyjatary fłešmobu spadziajucca źmianić śviet da lepšaha i abudzić u ludziach pačućcio pryŭkrasnaha.
«Ciapier u cełym śviecie čytać knihi — kłasiku ci navat madernovuju litaraturu — stała niepapularna, — kaža stvaralnik «Litara-A» Dzianis Burko. — Meta našaj akcyi — pryciahnuć uvahu da pryhožaha słova, padkreślić, što litaratura i stylovaja, i aktualnaja, i nadzionnaja».
Fłešmob, pavodle arhanizataraŭ, raspačynajecca adrazu ŭ niekalkich krainach, dzie ludzi buduć čytać vieršy na svaich movach. Takim čynam stvaralniki płatformy chočuć nahadać, što našaja mova takaja ž pryhožaja i vartaja, jak mova italjanskaja, polskaja, abo rasijskaja.
«My robim vyklik kožnamu čałavieku, kožnaj arhanizacyi biez vyklučeńnia, nie źviartajučy ŭvahi na ich pryncypy i pierakanańni, kab jany pračytali lubimy tvor (vierš abo ŭryvak z prozy ci ese) na videa i vykłali jaho na svaich partałach, staronkach u sacyjalnych sietkach. Čałaviek, abo arhanizacyja, jaki(ja) udzielničaje ŭ našaj akcyi, musić skazać na kamieru, što jon prymaje vyklik ad płatformy Litara-A», — tłumačyć praviły Dzianis Burko.
«Ideja našaj płatformy zaklučajecca ŭ «paezii čystaj krasy». My vierym u toje, što paezija i proza mohuć spyniać bomby i jadnać ludziej. Słova — heta samaja mocnaja zbroja, jakoj vałodaje čałaviectva; my nakiroŭvajem hetuju zbroju na jednaść i dyjałoh», — dadaje jon.
Pakul fłešmob raspačynajecca ŭ supołkach płatformy ŭ Fejsbuku i ŬKantakcie.