Na volu vyjšaŭ złodziej u zakonie Saša Kušnier
6 listapada, adsiedzieŭšy ad zvanka da zvanka, na volu vyjšaŭ hamialčanin Alaksandr Kušnier, bolš viadomy ŭ kryminalnym śviecie jak złodziej u zakonie pad mianuškami Saša Kušnier i Saša Biełarus. Pakarańnie jon adbyvaŭ u Mazyry ŭ papraŭčaj kałonii strohaha režymu VK-20.
Nahadajem, što Alaksandr Kušniaroŭ z svaich pražytych 48 hadoŭ ledź nie pałovu pravioŭ u miescach pazbaŭleńnia voli. U «lichich 90-ch» za dvajnoje zabojstva, učynienaje ŭ składzie bandy, jon byŭ prysudžany da śmiarotnaha pakarańnia, adnak rasstreł byŭ zamienieny na 15-hadovy termin. Paśla vyzvaleńnia Kušnier znachodziŭsia pad nahladam milicyi, ale ŭ śniežni 2010 hoda samavolna pakinuŭ Biełaruś, za što byŭ abvieščany ŭ miždziaržaŭny vyšuk.
Jak paźniej vyśvietliłasia, jon źjechaŭ u Maskvu i dałučyŭsia da kłana adnaho z samych upłyvovych kryminalnych aŭtarytetaŭ Asłana Usajana pa mianušcy Dzied Chasan.
U traŭni 2011 hoda Dzied Chasan «karanavaŭ» piać novych złodziejaŭ u zakonie, u liku jakich byŭ i Alaksandr Kušniaroŭ — jaho Dzied Chasan pryznačyŭ «hledziačym» za Biełaruśsiu.
Adnak na svabodzie ŭ novym statusie Saša Biełarus prabyŭ mienš za tydzień. 18 maja jaho zatrymali apieratyŭniki ŭ Ramienskim rajonie Padmaskoŭja. U jaho było znojdziena i kanfiskavana 3,24 h hierainu. Novaśpiečanamu złodzieju ŭ zakonie śviaciŭ termin ad 3 da 10 hadoŭ, adnak sud prysudziŭ jaho za ŭsio da 5 miesiacaŭ pazbaŭleńnia voli ŭ kałonii ahulnaha režymu. Pakarańnie biełaruski złodziej u zakonie adbyvaŭ u SIZA horada Kirava i vyzvaliŭsia ŭ śniežni 2011 hoda.
U lutym 2012 hoda biełaruski aŭtarytet znoŭ byŭ zatrymany rasijskimi palicejskimi, ale ŭžo za parušeńnie režymu znachodžańnia zamiežnych hramadzian na terytoryi Rasijskaj Fiederacyi. Jaho abaviazali dobraachvotna pakinuć Rasiju, ale jon praihnaravaŭ sudovaje rašeńnie. 6 listapada 2012 palicejskija zatrymali Kušniarova ŭ Maskvie kala mietro «Biełaruskaja» i ŭ toj ža dzień departavali na radzimu.
Kryminalny aŭtarytet abvinavačvaŭsia ŭ ździajśnieńni złačynstva pa art. 422 KK RB («Uchileńnie ad previentyŭnaha nahladu»). 15 sakavika 2013 jaho prysudzili da dvuch hadoŭ pazbaŭleńnia voli.
Za dva minułyja hady, pakul Alaksandr Kušniaroŭ siadzieŭ, u prafiesijnym kryminalnym śviecie adbylisia istotnyja źmieny ŭ rasstanoŭcy sił.
Niama bolš «chrosnaha baćki» Sašy Kušniera Dzieda Chasana: jaho zabili 16 studzienia 2013 hoda ŭ Maskvie. Prychilniki dziedavaha kłana pačali razborki i stali vyśviatlać «chto samy hałoŭny».
«Idejnyja» praciŭniki Kušniera biełaruskija «zakońniki» Alaksandr Cimašenka i Dźmitryj Halejeŭ, jany ž — Cimocha i Halej, u śniežni 2012 hoda vystupili inicyjatarami «karanacyi» čatyroch novych złodziejaŭ u zakonie. Na schodcy ŭ Dubai imi stali Saša «Miedźviedziania» Homielski, Aleh Słucki (Mumu), Paštet Minski i Rusłan «Lebiedz» Barysaŭski. I hetyja «braty», možna skazać asiracieli. Cimochu zastrelili 31 maja 2013 hoda ŭ Padmaskoŭi, a Halej rašeńniem suda Zavodskaha rajona Minska ŭ sakaviku biahučaha hoda atrymaŭ 11 hadoŭ stroha režymu za vymahalnictva. Paźniej hod jamu «skaścili» pa amnistyi, pakarańnie jon adbyvaje ŭ Horkach.
Z «dubajskoj čaćviorki» na svabodzie zastajecca adzin Rusłan Lebiedź. Kažuć, jon zrabiŭ vajaž pa Ukrainie, a zatym pierabraŭsia Zachodniuju Jeŭropu. 40-hadovy Aleh Hierasimovič, jon ža Mumu, byŭ prysudžany 21 lipienia biahučaha hoda Słuckim rajonnym sudom Minskaj vobłaści da dvuch hadoŭ pazbaŭleńnia voli za ŭchileńnie ad previentyŭnaha nahladu. Miedźviedziania čakaje suda ŭ Homieli, a Paštet znachodzicca ŭ Pskovie, dzie jamu pahražaje kryminalnaje pakarańnie za niezakonnaje znachodžańnie na terytoryi Rasii.
Na dumku ekśpiertaŭ rasijskaha ahienctva «Prajm Krajm», vyzvaleny Saša Kušnier «maje ŭsie šancy stać adnaasobnym kryminalnym lidaram Biełarusi, jakim jaho ŭ svoj čas i zadumvaŭ Dzied Chasan».
Sumnieŭna, što taki šaniec złodzieju ŭ zakonie daduć biełaruskija pravaachoŭniki. Pa niekatorych źviestkach, niezadoŭha da vyzvaleńnia naŭprost u kałonii supracoŭniki ŭpraŭleńnia pa baraćbie z arhanizavanaj złačynnaściu praviali z «zakońnikam» tak zvanuju prafiłaktyčnuju hutarku. Praściej kažučy, papiaredzili…
***
U kastryčniku 2001 hoda Alaksandr Łukašenka paviedamiŭ, što jašče piać hadoŭ tamu «praz peŭnych žulikaŭ» papiaredziŭ kryminalnych lidaraŭ: «Nie daj Boh niedzie vy stvorycie abstanoŭku kryminalnuju, ja vam paadryvaju ŭsim hałovy». I dadaŭ: «Byŭ vypadak, kali jany niapravilna siabie paviali. Pamiatajecie vy hetych ščaŭlikaŭ i inšych. Dzie jany ciapier? Tamu ŭ krainie paradak i ŭsie zadavolenyja». Złodziej u zakonie Ščaŭlik, nahadajem, prapaŭ bieź viestak u Minsku ŭ śniežni 1997 hoda.
Praź dziesiać hadoŭ, u krasaviku 2011 hoda, u vystupie z pasłańniem biełaruskamu narodu i parłamientu Łukašenka znoŭ uspomniŭ pra bandytaŭ: «Ja vam ščyra raspavioŭ, što jašče 10 hadoŭ tamu nazad, što hrupoŭki, jakija ŭ svoj čas z savieckich štonikaŭ vyraśli, suviazi ŭ ich byli vielmi ciesnyja z Maskvoj, my ich vielmi chutka prybrali da paradku. Toj, chto nie padparadkavaŭsia, ich užo i kostki zhnili. U nas nie moža być na kryminalnaj asnovie hetych razborak».