AMAP zatrymaŭ hurt Dzieciuki za zdymki klipa
abnoŭlena
Muzykaŭ hrodzienskaha hurtu Dzieciuki zatrymali ŭ Zasłaŭi, dzie jany zdymali klip.
«Nas zaraz viazuć u RUUS Zasłaŭja. Zatrymali ŭsich muzykaŭ dy tych, chto dapamahaŭ nam u pracy nad klipam, u tym liku historyka Ihara Mielnikava. Usich pasadzili ŭ aŭtazak, u lubym momant mohuć zabrać telefon», – paviedamiŭ adrazu paśla zatrymańnia vakalist Dzieciuki Aleś Dzianisaŭ.
Na dadzieny momant usie ŭdzielniki zdymak adpuščanyja ź milicyi. Pra heta Aleś Dzianisaŭ paviedamiŭ BiełaPAN.
Usiaho, pavodle jaho słoŭ, było zatrymana 18 čałaviek. Milicyjanty paličyli zdymki klipa (jakija, darečy, prachodzili ŭ poli i nikomu nie zaminali) za niesankcyjanavanaje šeście. Zatrymali na toj padstavie, što nijakich dazvalalnych papieraŭ muzyki nie mieli. Dazvoł na zdymki nieabchodna było atrymać u Zasłaŭi.
Muzyki zdymali klip na pieśniu «Chłopcy-bałachoŭcy» z svajho albomu «Haradzienski harmidar».