Čamu mianie abaviazvajuć vypisvać «Nastaŭnickuju hazietu»?
fota z sajta Nastaŭnickaj haziety
Ja nastaŭnik. Pracuju ŭ škole čaćviorty hod. Mianie abaviazvajuć vypisać «Nastaŭnickuju hazietu» na paŭhoda i prynieści kvitancyju ab vypiscy adkaznamu vykanaŭcu ŭ škole albo zdać hrošy. Suma ścipłaja — 300 tys. rubloŭ. Na pytańnie «čamu ja abaviazany» u katory raz atrymlivaju nievyrazny adkaz.
Samy časty — što ja abaviazany znajomicca ź mietadyčnaj litaraturaj, vypłaty na jakuju adbyvajucca kožny miesiac. Ale ci źjaŭlajecca hazieta mietadyčnaj litaraturaj? Darečy, za 6 pracoŭnych miesiacaŭ suma hetych dapłat mienš za 300 tys. rubloŭ.
Nastupny arhumient — zdajuć usie, i ja abaviazany zdać jak usie. Tut cikaviej. Zdavać hrošy na dobraachvotnuju padpisku. I kali ja nie zdam, to sumu pryjdziecca padzialić na astatnich členaŭ majho mietadyčnaha abjadnańnia. I čamu niechta pavinien płacić, a ja nie?
Inšy varyjant — vykanańnie pastanovy adździeła adukacyi, jaki davodzić płan, u jakim skazana, kolki i jakich padpisak škoła abaviazana pravieści i dać spravazdaču. U inšym vypadku praca škoły budzie ličycca niezdavalniajučaj. Što, viadoma, nie abiacaje administracyi ničoha dobraha.
Pierad minułym «pieryjadam» padpiski ŭ mianie adbyłasia cikavaja razmova z dyrektaram škoły. Dyrektar prasiła hrošy zdać i «nie parušać vykanalnickuju dyscyplinu». My ž rabotniki dziaržaŭnaj arhanizacyi i vykonvajem dziaržzamovu. A pakazanuju sumu mnie abaviazkova pakryjuć u nastupnych zarobkach z premijalnaha fondu, jak i ŭsim inšym nastaŭnikam. Ci źjaŭlajecca heta metavaj zadačaj hetaha fondu? Na heta jon pavinien być nakiravany? Adkaz tut taksama nie patrabujecca.
Z kim ni razmaŭlaŭ na hetuju temu, usie ŭ adzin hołas adkazvajuć: «heta nie pravilna, ale zrabić ničoha nie možam». Takija patrabavańni. Tut ja navat spačuvaju administracyi.
Z materyjałami «Nastaŭnickaj» ja znajomlusia na sajcie haziety. Časam materyjał tam sustrakajecca vielmi cikavy i karysny. Ale ahulnaje napaŭnieńnie haziety nie vyklikaje ŭ mianie žadańnia pajści na poštu.
U takim vypadku, jak pracavać redakcyi, kali hazietu pierastanuć prymusova prymušać vypisvać? Jak źmienicca nakład «Nastaŭnickaj», «Junaha pažarnaha», «Junactva» i inšych vydańniaŭ, nazvy jakich znachodziacca ŭ tym samym śpisie?
Dyk čamu mianie abaviazvajuć u prymusovym paradku padpisvacca? Vydatkavaŭ nie adnu hadzinu, sprabujučy znajści adkaz na sajtach haziety, Ministerstva. Ale ŭ razvažańniach tych, chto staviŭ dadzienaje pytańnie i ŭ kamientarach praskokvaje tolki adna dumka — pramoje parušeńnie pracoŭnaj damovy i zakanadaŭstva.