BT adkazała na statystyku NISEPD: «Zatoje na Jandeks.Navinach Łukašenku stali ŭzhadvać udvaja čaściej»
Telekanał «Biełaruś-1» uskosna adkazaŭ na vyniki daśledavańnia NISEPD. Pavodle padlikaŭ sacyjołahaŭ, rejtynh Alaksandra Łukašenki źmienšyŭsia da 40%.
Televizijonščyki dali svoj adkaz, u paćvierdžańnie papularnaści Łukašenki jany sabrali ličby… internet-prahladaŭ.
«Da navahodniaha vinšavańnia prezidenta było prykavana asablivaja ŭvaha ajčynnych i zamiežnych ŚMI, a taksama šarahovych karystalnikaŭ interneta. Tolki na Ju'Tub kanale BiełTA videa navahodniaha zvarotu za try dni pahladzieła bolš za 32 tysiačy čałaviek», — pachvaliŭsia viadučy Siarhiej Husačenka.
«Adzin ź infarmacyjnych resursaŭ raźmiaściŭ 1 studzienia navahodnija zvaroty Alaksandra Łukašenki, Uładzimira Pucina i Piatra Parašenki, prapanavaŭšy ich paraŭnać, — praciahnuła Palina Šuba. — Internet-karystalniki pryjšli da vysnovy, što «najlepšaje vinšavańnie ŭ prezidenta Biełarusi, tamu što na čałaviečnaści i adzinstvie treba kancentravacca», a nie na «pieramozie», «vorahach» ci asobna ŭziataj Radzimie, niachaj i vialikaj».
Cikava, što hety kamientar BT uziało z-pad artykuła na sajcie Radyjo Svaboda. Jon naležyć Natalli Dacyk z Mazyra. Adnak bolšaść mierkavańniaŭ tamtejšych kamientataraŭ nazvała najlepšym zvarot Piatra Parašenki.
«Darečy, u ŚMI nazirajecca ŭstojlivy, maštabny rost cikavaści da dziejnaści i palityčnaj postaci prezidenta Biełarusi. U śniežni kolkaść zhadak «kiraŭnika dziaržavy» ŭ presie ŭ paraŭnańni ź listapadam pavialičyłasia bolš čym udvaja. I pa dadzienych mižnarodnaha ahrehatara navinaŭ «Jandeks.Naviny», pieravysiła 11 tysiač. Taksama ŭ śniežni Alaksandr Łukašenka ŭvajšoŭ u top-10 samych zhadvanych u rasijskich ŚMI pierson miesiaca — pa viersii «Sistemy kompleksnaha analizu navinaŭ», — padsumavaŭ Siarhiej Husačenka.