Camerata na Rastvo pradstaviła novy tvor u abnoŭlenym składzie
Unikalny biełaruski kalektyŭ pradstaŭlaje na Tuzin.fm svoj novy tvor «Na Rastvo» u abnoŭlenym składzie, jaki zastavaŭsia niaźmiennym 20 hod. Camerata pakinuli Taciana Drobyšava dy Ihar Mielnikaŭ. Novym udzielnikam kamandy staŭ Pilip Śmiałoŭ.
Vybitny vakalny bend ź Miensku Camerata raptoŭna źmianiŭ skład. Toje adbyłosia ŭpieršyniu z 1995, kali kalektyŭ pakinuŭ jaho stvaralnik Aleh Šykunoŭ, i nakonadni 30-hodździa hurtu, što budzie śviatkavacca ŭ 2016.Ź liku čalcoŭ Camerata vyjšli Taciana Drobyšava j Ihar Mielnikaŭ. Apošni praciahły čas byŭ kiraŭnikom hurtu paśla Šykunova. Biez hetych dvuch vakalistaŭ Camerata padajecca niapoŭnaj. Źmieny ŭ składzie hledačy mahli zaŭvažyć ad pačatku muzyčnaha sezonu, to bok z vosieni. Dahetul hurt nie davaŭ nijakich tłumačeńniaŭ, a na jahonym aficyjnym sajcie značycca stary śpis udzielnikaŭ.
Sytuacyju prakamentavała asnoŭnaja aŭtarka Camerata, kampazytar i vakalistka Volha Vierabjova: «Ihar i Taciana syšli za bolš vysokimi zarobkami. My ŭziali naŭzamien tolki barytona. Heta Pilip Śmiałoŭ. Jon vypusknik muzyčnaha liceju, jak i ŭsie, chto zaraz u «Kameracie». Da taho ž u jaho dźvie vyšejšyja adukacyi – charavoha dyryhienta j hukarežysera».
U svaju čarhu Ihar Mielnikaŭ patłumačyŭ, što jamu paprostu nadakučyŭ raniejšy vid dziejnaści, i jon ciapier zaniaŭsia pedahohikaj: «Ź 1 vieraśnia ja pracuju ŭ arkiestry Finberha. Zajmajusia z usim vakalnym cecham – tuzinam vakalistaŭ. Akrom taho, dla padtrymki formy my z Tacianaj Drobyšavaj stvaryli vakalny kvartecik z bolš lohkaj i žyćcieśćviardžalnaj muzykaj, z tradycyjnym džazam. Nazvy jon pakul nia maje. U nas tolki adna repetycyja była razam ź instrumentalistami. Viarstajem prahramu. A «Kameracie» ja žadaju pośpiechaŭ. Chaj pracujuć i vystupajuć dalej. Kali im heta cikava, ja tolki za».
Vidać, što Dziaržaŭny kancertny arkiestr Finberha prapanavaŭ muzykam lepšyja ŭmovy, čym u Biełdziaržfilarmonii. Darečy, koliś, u 1996 – 1998 Camerata ŭžo pracavała ŭ składzie arkiestra Finberha jak samastojny kalektyŭ, a paśla stała j dahetul źjaŭlajecca štatnaj adzinkaj BDF. Bližejšy kancert abnoŭlenaje «Kameraty» adbudziecca 15 studzienia ŭ Vialikaj zali filarmonii supolna z maskoŭskim hurtom Cristal Chorus. Pa słovach Volhi Vierabjovaj, jak i raniej, namiačajucca kancerty ŭ Biełarusi j za miažoj, adnačasova idzie praca nad novymi kampazycyjami. Adnoj ź ich stała aŭtarskaja kaladka Volhi «Na Rastvo», jakuju hurt siońnia rady prezentavać naviednikam Tuzin.fm.