Parašenka pryvitaŭ kaladoŭščykaŭ u rezidencyi, paprasiŭ malicca za sałdat VIDEA
Prezident Ukrainy Piatro Parašenka zapisaŭ kaladnaje vinšavańnie, u jakim pavinšvavaŭ suhramadzian z Rastvom i padkreśliŭ nieabchodnaść zachoŭvać vieru ŭ Boha.
U roliku Parašenka ź siamjoj sustrakajuć kaladoŭščykaŭ, śpiavajuć razam ź imi, a potym jon źviartajecca da ŭsich ukraincaŭ z 2-chvilinnym vinšavańniem.
«Da chrysijanskaj jeŭrapiejskaj cyvilizacyi naša kraina naležyć užo bolš za tysiaču hod, ale mienavita siońnia naradžajecca znoŭ. I našyja płany źmianić žyćcio da lepšaha ŭsich hramadzian Ukrainy zdiejśniacca tolki pry ŭmovie, što my budziem šanavać Boha, nie budziem parušać śviatych Jaho zapavietaŭ», — kaža prezident, stojačy ź siamjoj siarod maładych kaladoŭščykaŭ.
Ukraina pieršy raz u svajoj najnoŭšaj historyi śviatkuje Kalady ŭ vajennych umovach — Rasija zachapiła ŭkrainski Krym, pad kantrolem rasijkich bajevikoŭ znachodziacca častki terytoryi Danieckaj i Łuhanskaj abłaściej, kožny dzień praciahvajucca abstreły.
«Jezus skazaŭ, što niama bolšaj za tuju luboŭ, kali niechta addaje dušu svaju za siabroŭ svaich. Tamu ŭ hetyja śviatočnyja dni asabliva molimsia za našych vojaŭ. I niachaj Pan zachavaje ich žyćci», — dadaŭ Parašenka, jaki naležyć da Ukrainskaj Pravasłaŭnaj Carkvy Maskoŭskaha Patryjarchata.
Jon ź siamjoj śviatkuje Rastvo ŭ prezidenckaj rezidencyi ŭ vioscy Huta na Ivana-Frankoŭščynie, siońnia jon taksama naviedaŭ staražytny pravasłaŭny klaštar u Maniaŭskim skicie. Hety klaštar naležyć ciapier Ukrainskaj Pravasłaŭnaj Carkvie Kijeŭskaha Patryjarchata.
Jak ukrainskija pravasłaŭnyja, hetak i hreka-kataliki na terytoryi Ukrainy śviatkujuć Rastvo pa julianskim kalendary.