Hamafobii nie ŭhledzieli: chulihanu, što zrabiŭ minskaha hieja invalidam, pakinuli raniejšy termin źniavoleńnia
Dźmitryj Łukaševič, fota Kiryły Chilko.
Siońnia, 13 studzienia, sud Centralnaha rajona Minska znoŭ prysudziŭ 30-hadovaha Dźmitryja Łukaševiča da 2 hadoŭ i vaśmi miesiacaŭ pazbaŭleńnia voli ŭ kałonii ŭzmocnienaha režymu. Taksama Łukaševiča abaviazali vypłacić 150 młn rubloŭ maralnaj škody na karyść Michaiła Piščeŭskaha i 63 młn rubloŭ materyjalnych vydatkaŭ maci Michaiła Valancinie Bartaševič na lačeńnie syna.
Sudom uličana, što maci Dźmitryja Łukaševiča ŭžo pieraviała na depazit 27 młn rubloŭ kampiensacyi.
Takim čynam Dźmitryj Łukaševič pryznany vinavatym pavodle č. 1 art. 339 («naŭmysnyja dziejańni, jakija hruba parušajuć hramadski paradak i vykazvajuć vidavočnuju niepavahu da hramadstva, jakija supravadžajucca prymianieńniem hvałtu abo pahrozaj jaho ŭžyvańnia abo źniščeńniem abo paškodžańniem čužoj majomaści abo jakija adroźnivajucca pavodle svajho źmiestu vyklučnym cynizmam (chulihanstva), i art 155 («pryčynieńnie ciažkaha abo mienš ciažkaha cialesnaha paškodžańnia pa nieaściarožnaści»).
Prakuror prasiŭ pakarać Łukaševiča pavodle p.7 č. 2 art. 147 KK RB («naŭmysnaje pryčynieńnie ciažkaha cialesnaha paškodžańnia … z chulihanskich mierkavańniaŭ» i č.2 art. 339 KK RB («chulihanstva, ździejśnienaje paŭtorna, abo hrupaj asob, abo źviazanaje z supracivam asobie, jakaja spyniaje chulihanskija dziejańni, albo spałučanaje z pryčynieńniem mienš ciažkaha cialesnaha paškodžańnia (złosnaje chulihanstva)»)
Nahadajem, što Łukaševič udaryŭ 31-hadovaha Michaiła Piščeŭskaha padčas sprečki, što zaviazałasia pamiž mužčynami, nočču 25 maja 2014 hoda la kłuba «Andervorłd» na adrasie vulicy Lesi Ukrainki, 22.
U vyniku Piščeŭski atrymaŭ ciažkuju čerapna-mazhavuju traŭmu, jamu vydalili kala 20% hałaŭnoha mozhu. Z toj nočy Piščeŭski faktyčna znachodzicca ŭ viehietatyŭnym stanie i prykavany da łožka.
Padčas sudovaha śledstva ŭsie baki pryznali, što pryčynaj sprečki stała abraza Piščeŭskaha pavodle jaho nietradycyjnaj seksualnaj aryjentacyi — jon źjaŭlajecca hiejem.
Nahadajem, što sud Centralnaha rajona Minska 16 kastryčnika 2014 hoda prysudziŭ Dźmitryja Łukaševiča da 2 hadoŭ 8 miesiacaŭ pazbaŭleńnia voli pavodle artykuła 155 «Pryčynieńnie ciažkaha abo mienš ciažkaha cialesnaha paškodžańnia pa nieaściarožnaści» i častki 1 artykuła 339 «Chulihanstva» (naŭmysnyja dziejańni, jakija hruba parušajuć hramadski paradak i vykazvajuć vidavočnuju niepavahu da hramadstva, jakija supravadžajucca prymianieńniem hvałtu abo pahrozaj jaho ŭžyvańnia albo źniščeńniem abo paškodžańniem čužoj majomaści albo jakija adroźnivajucca pa svaim źmieście vyklučnym cynizmam).
Abvinavačvańnie paličyła prysud zanadta miakkim i paprasiła Minski haradski sud pavialičyć termin źniavoleńnia da siami hadoŭ.
Svajaki Piščeŭskaha chadajničali ab admienie prysudu i adpraŭcy spravy na pierahlad inšaj sudovaj kamisijaj. Heta chadajnictva ŭ vyniku i padtrymaŭ Minharsud, ale siońnia prysud byŭ pakinuty ŭ raniejšaj redakcyi.
Adnak maci i siastra Piščeŭskaha zajavili, što abskardžvać prysud nie buduć, bo ŭ ich niama maralnych i fizičnych sił na heta.