Kajł Makłachlen viartajecca ŭ «Tvin Piks»
Kadr ź filma
Akcior Kajł Makłachlen, jaki syhraŭ hałoŭnuju rolu ŭ telesieryjale «Tvin Piks», paćvierdziŭ svoj udzieł u zdymkach praciahu prajekta.
Pra heta jon abjaviŭ na adkryćci vystavy Television Critics Association, paviedamlaje The Hollywood Reporter. Infarmacyja ab astatnich akciorach źjavicca paźniej. Mini-sieryjał płanujecca vypuścić ŭ 2016 hodzie.
«Padobna na toje, vam patrebny kubačak čartoŭski dobraj kavy»,— skazaŭ Makłachlen na mierapryjemstvie, pierajmajučy maniery svajho hieroja ŭ sieryjale — ahienta FBR Dejła Kupiera. Prezident kanała Showtime, jaki płanuje tranślavać praciah «Tvin Piks», Devin Nievins udakładniŭ, što ŭ akciora budzie viadučaja rola. Paźniej jon dadaŭ, što ŭ prajekt, vierahodna, viernucca i niekatoryja inšyja akciory z aryhinalnaha sieryjała.
Stvaralniki sieryjała Devid Linč i Mark Frost ŭ kastryčniku abviaścili pra viartańnie «Tvin Piks» na ekrany. Frost taksama paabiacaŭ vypuścić knihu, u jakoj raskryje niekatoryja tajamnicy sieryjała.
Sieryjał «Tvin Piks» vychodziŭ u efir u ZŠA na praciahu dvuch siezonaŭ z krasavika 1990 pa červień 1991 hoda. Jon uklučaje ŭ siabie 30 sieryj. Siužet razhortvajecca vakoł zabojstva školnicy Łory Pałmier, jakoje rasśleduje śpiecyjalny ahient FBR Dejł Kupier.