Hruzčyk raźbiŭ sabie hałavu kavałkam asfaltu, kab inscenavać abrabavańnie
21-hadovy N., były hruzčyk ŭniviersama Lelčyckaha rajspažyŭtavarystva i aŭtar scenaryja falšyvaha rabavańnia, paŭstaŭ pierad sudom. Vosieńniu minułaha hoda małady čałaviek, jakomu davieryli adnieści ŭ bank dzionnuju vyručku, padniaŭ na nohi ŭsiu milicyju viestkaj pra toje, što na jaho napali troje bandytaŭ i adabrali hrošy. Paćviardžeńniem lichadziejstva była raźbitaja hałava.
Hetamu chłopcu ciažka nie pavieryć. Hod adpracavaŭ va ŭniviersamie — nivodnaj zaŭvahi. Adziny niuans u bijahrafii: dva hady tamu trapiŭsia na iłžeminiravańni. Tady tłumačyŭ, što takim sposabam chacieŭ pravieryć apieratyŭnaść słužbaŭ. Na ciapierašnim sudzie pradaŭcy ŭniviersama pryznavalisia, što dzionnuju vyručku daviarali N. šmat razoŭ. Vielmi prystojnyja sumy. Čamu jon pakvapiŭsia na 6 miljonaŭ rubloŭ, zastałosia tajamnicaj. Pa słovach N., u hrošach asabliva nie mieŭ patreby: dzialiŭsia z mamaj, uziaŭ u kredyt miakki kutok. Mahčyma, znoŭ praviaraŭ słužby… Bo scenar rabavańnia vyhladaŭ vielmi naturalna, raspaviadaje Valancina Lisickaja, pamočnik prakurora rajona:
— Kavałkam asfaltu N. raźbiŭ sabie hałavu, mietaličnym pradmietam parezaŭ kurtku. A paśla patelefanavaŭ u milicyju i paviedamiŭ, što jaho vykrali troje nieviadomych na šerym «Mersedesie», źbili, adabrali hrošy…
Dziesiać dzion małady čałaviek pralažaŭ u špitali z traŭmaj hałavy. A kali vypisaŭsia, śledčyja pačali ź im pracavać pradmietna. Nadta ž šmat niestykovak vychodziła. U vyniku hruzčyk sam pakazaŭ, dzie lažać mahazinnyja hrošy, ź jakich jon vydatkavaŭ tolki 600 tysiač rubloŭ. Spačatku zachoŭvaŭ ich u lesie, zakapaŭšy ŭ słoiku, a potym pieranios dadomu, nie kranuŭšy bolš ni kapiejki. Tamu škodu rodnyja kampiensavali chutka — jašče da suda.
Hetaja akaličnaść, a taksama biezdakornyja charaktarystyki i novaje miesca pracy stali arhumientam na karyść byłoha hruzčyka, jaki ciapier pracuje ŭ cechu pa zborcy mebli. Rajonny sud prysudziŭ jaho da dvuch hadoŭ abmiežavańnia voli biez nakiravańnia ŭ vypraŭlenčuju ŭstanovu adkrytaha typu.