BiełaPAN: Štohadovaja vialikaja pres-kanfierencyja Łukašenki płanujecca 29 studzienia
Pavodle źviestak BiełaPAN, štohadovaja vialikaja pres-kanfierencyja Alaksandra Łukašenki biełaruskim i zamiežnym ŚMI płanujecca 29 studzienia. Aficyjna hetaja infarmacyja pakul nie paćviardžajecca.
Štohadovyja sustrečy z pradstaŭnikami biełaruskich i zamiežnych ŚMI kiraŭnik dziaržavy zvyčajna pravodzić u kancy ci pačatku hoda. Tak, u 2011 hodzie vialikaja pres-kanfierencyja adbyłasia 23 śniežnia, na jaje byli zaprošanyja prykładna 400 pradstaŭnikoŭ bolš jak 300 ŚMI. Nastupnaja pres-kanfierencyja prajšła 15 studzienia 2013 hoda z udziełam bolš jak 350 pradstaŭnikoŭ 285 ŚMI.
U 2014 hodzie mierapryjemstva adbyłosia 21 studzienia, pryčym jaho farmat byŭ źmienieny: na sustreču z Łukašenkam u Pałac Niezaležnaści zaprasili kiraŭnikoŭ najbujniejšych biełaruskich dziaržaŭnych i niedziaržaŭnych ŚMI. Akramia taho, u adroźnieńnie ad pres-kanfierencyj, pramoj tranślacyi nie było — u viačernim efiry była pakazanaja tolki televiersija. Sam Łukašenka rastłumačyŭ farmat mierapryjemstva tak: «Adkryta skažu: mnie davodzicca pravodzić u takim maštabie mierapryjemstvy z žurnalistami, ale jany mnie nie vielmi padabajucca, tamu što heta padobna na niejkuju lekcyju. Usio ž u vuzkim kruzie zacikaŭlenych i daśviedčanych ludziej možna bolš padrabiazna abmierkavać tyja ci inšyja pytańni, jakija siońnia chvalujuć ludziej, i pasprabavać, kali heta atrymajecca, zazirnuć u niedalokuju budučyniu».
Farmat i miesca praviadzieńnia pres-kanfierencyi pakul nie viadomyja.