Łukašenka — darmajedam: Za čyj košt, vy, spadary, budziecie žyć?
Vyrašać prablemy efiektyŭnaj pracoŭnaj zaniataści nieabchodna nie adkładvajučy na doŭhi čas.
Pra heta Alaksandr Łukašenka zajaviŭ siońnia na naradzie, dzie abmiarkoŭvaŭsia prajekt dekreta, nakiravany na stymulavańnie zaniataści hramadzian.
Kiraŭnik dziaržavy nahadaŭ, što ŭ kastryčniku minułaha hoda daručaŭ uradu sumiesna z Administracyjaj prezidenta raspracavać kankretnyja miery pa ŭklučeńni ŭ pracoŭnuju dziejnaść niepracujučych hramadzian i spynieńnia razdačy dziaržaŭnych dabrotaŭ tak zvanym łajdakam.
U hetym kirunku ŭžo pryniaty šerah rašeńniaŭ u častcy pavieličeńnia minimalnaha pracoŭnaha stažu dla pryznačeńnia pracoŭnych piensij, pavyšeńnia ŭzrostu dla zvarotu pa minimalnuju sacyjalnuju piensiju pry adsutnaści patrabavanaha stažu pracy. Uzmocnieny taksama ŭpłyŭ praciahłaści pracoŭnaha stažu na pamier pryznačanaj piensii.
«Ale ŭsie hetyja miery kali i zdolnyja akazać stanoŭčy ŭpłyŭ na kolkaść pracoŭnych resursaŭ, to tolki ŭ addalenaj pierśpiektyvie.
A nam nieabchodna vyrašać prablemy efiektyŭnaj pracoŭnaj zaniataści nie adkładajučy na doŭhi čas», — zajaviŭ Alaksandr Łukašenka.
Pavodle źviestak kiraŭnika dziaržavy, kala 500 tys. pracazdolnych hramadzian u Biełarusi aficyjna nidzie nie pracujuć, nie płaciać padatki, ale pry hetym karystajucca sacyjalnymi vyhodami, jakija pradstaŭlajucca dziaržavaj: biaspłatnaj miedycynaj i adukacyjaj, subsidzivanymi taryfami na ŽKH i transpart i h.d.
«Tamu dziaržava maje prava ź ich zapytacca: za čyj košt vy, spadary, budziecie žyć? Hetyja ludzi pavinny pracavać, płacić padatki i žyć za svoj košt. Sacyjalnaha ŭtrymanstva być nie pavinna», — padkreśliŭ biełaruski lidar.
U toj ža čas jon adznačyŭ, što dziaržava budzie akazvać dapamohu tym, chto pa abjektyŭnych pryčynach nie moža hetaha rabić, naprykład invalidam.