Banki masava źnižajuć staŭki pa terminovych rublovych układach
Najbujniejšyja biełaruskija banki abviaścili pra źnižeńnie pracentnych stavak pa terminovych rublovych układach fizičnych asob. Hrašova-kredytnyja ŭstanovy źmienšyli dachodnaść pa rublovych depazitach na 5 pracentnych punktaŭ.
U pryvatnaści adzin z bujniejšych trymalnikaŭ srodkaŭ nasielnictva — «Biełahraprambank» — 13 studzienia źniziŭ pracentnuju staŭku pa terminovym rublovym układzie «Vialikija hrošy» z 50 da 45%.
«Biełarusbank» na anałahičny krok pajšoŭ 10 studzienia: staŭka pa terminovym rublovym układzie «Harantavany dachod» była źnižanaja taksama z 50 da 45% hadavych.
«Biełhazprambank», jaki ŭvachodzić u šaściorku viadučych bankaŭ krainy, źmienšyŭ staŭku pa terminovym rublovym układzie «Racyjanalny» z 49 da 44%.
Źnižeńnie pracentnych stavak u kamiercyjnych bankach adbyłosia paśla rašeńniaŭ Nacbanka pa pytańniach pracentnaj palityki, jakija byli pryniatyja na minułym tydni.
9 studzienia pavodle rašeńnia rehulatara vierchniaja miaža pracentnych stavak pa depazitach jurydyčnych asob była źnižanaja z 50 da 40% hadavych. Adnačasova z hetym Nacbank adznačaŭ, što pa miery dalejšaj stabilizacyi situacyi na finansavym rynku staŭki pa depazitach fizasob taksama buduć źmianšacca.
Vyšejpieraličanyja zachady, jak adznačaŭ Nacbank, skiravanyja na «farmiravańnie ŭ ekanomicy ŭzroŭniu pracentnych stavak, jakija zabiaśpiečvajuć finansavuju i makraekanamičnuju stabilnaść, zapavoleńnie inflacyi, a taksama bałans intaresaŭ układčykaŭ i pazyčalnikaŭ».
U śniežni 2014 hoda na fonie rezkaha pavieličeńnia popytu nasielnictva na zamiežnuju valutu Nacbank pryniaŭ rašeńnie praktyčna ab dvuchrazovym pavieličeńni pracentnych stavak na depazitnym rynku — da 50% hadavych. U suviazi z hetym banki vymušanyja byli pajści na značnaje pavyšeńnie koštu kredytnych resursaŭ.