Ekspart asnoŭnych biełaruskich tavaraŭ u Rasiju skaraciŭsia na 1 młrd dalaraŭ
Ekspart dziesiaci asnoŭnych biełaruskich tavaraŭ u Rasiju ŭ studzieni—listapadzie 2014 hoda u paraŭnańni z anałahičnym pieryjadam 2013 hoda skaraciŭsia na 1 młrd. dalaraŭ, śviedčać źviestki aficyjnaj statystyki.
Ekspart traktaroŭ i siedłavych ciahačoŭ źniziŭsia na 172,5 młn. dalaraŭ, małaka i viarškoŭ — na 166 młn. dalaraŭ, hruzavych aŭtamabilaŭ — na 145,9 młn. dalaraŭ, šyn — na 117,8 młn.
Taksama istotna pamienšyŭsia ekspart u RF mašyn dla ŭborki sielhaskultur (na 88,7 młn. dalaraŭ), mietałapradukcyi — stalnych prutkoŭ (na 83,3 młn.).
Pastaŭki kaŭbas i anałahičnych praduktaŭ ź miasa skaracilisia na 70,4 młn. dalaraŭ, śvininy — na 60,8 młn. dalaraŭ.
Poruč z hetym zafiksavana źnižeńnie ekspartu ŭ Rasiju televizaraŭ i aŭtobusaŭ.
U listapadzie 2014 hoda ŭ paraŭnańni z kastryčnikam valutnyja pastupleńni (vyručka) ad ekspartu biełaruskich tavaraŭ u Rasiju źniziłasia na 266,8 młn. dalaraŭ da 1 młrd. 76,2 młn. dalaraŭ.
Na dumku ekśpiertaŭ, źnižeńnie valutnych pastupleńniaŭ ad ekspartu biełaruskich tavaraŭ u Rasiju abumoŭlena šeraham pryčyn, u pieršuju čarhu paskareńniem tempaŭ devalvacyi rasijskaha rubla ŭ čaćviortym kvartale 2014 hoda, u vyniku čaho ekspartnaja vyručka Biełarusi ŭ dołaravym vyražeńni stała pamianšacca.
Vystupajučy ŭ listapadzie ŭ Pałacie pradstaŭnikoŭ, premjer-ministr Michaił Miaśnikovič kanstatavaŭ, što z-za źnižeńnia cen (u dołaravym vyražeńni) na rynku Rasii biełaruskim eksparcioram davodzicca šukać inšyja hieahrafičnyja kirunku zbytu svajoj pradukcyi.
Akramia taho, vosieńniu 2014 hoda mnohim biełaruskim vytvorcam miasa-małočnaj pradukcyi byli zabaronieny pastaŭki na rasijski rynak.
Ustanoŭlenyja abmiežavańni rasijskija ŭłady matyvavali tym, što partyi biełaruskaj pradukcyi nie adpaviadajuć sanitarnym normam i patrabavańniam, praduhledžanym rasijskim zakanadaŭstvam.