Skutery pryraŭniajuć da matacykłaŭ
Pra heta na pres-kanferencyi 11 studzienia ŭ Miensku zajaviŭ ministar unutranych spraŭ Uładzimier Navumaŭ, akreślivajučy pazycyju milicejskaha viedamstva ŭ hetym pytańni.
Pavodle jaho słoŭ, heta tyčycca atrymańnia hramadzianami, jakija kirujuć skuterami, takich ža vadzicielskich paśviedčańniaŭ, jakija atrymlivajuć matacyklisty, a taksama mier arhanizacyi biaśpieki, naprykład kiravańnia skuteram tolki ŭ achoŭnym šlemie. Adpaviednyja prapanovy pa źmianieńni zakanadaŭstva ŭ MUS užo padrychtavany, skazaŭ ministr.
Zakranajučy novaje, što nieabchodna, na dumku MUS, unieści ŭ sistemy arhanizacyi biaśpieki darožnaha ruchu, U.Navumaŭ adznačyŭ ŭzmacnieńnie kantrolu za pavodzinami na darozie viełasipiedystaŭ. Ciapier na ich, naprykład, nie raspaŭsiudžvajecca patrabavańnie abaznačać siabie pry ruchu ŭ ciomny čas sutak śviatłoadbiŭnymi elemientami.
Cikavy, z punktu hledžańnia kiraŭnika MUS, vopyt Šviejcaryi, dzie, pavodle jaho słoŭ, vadzicieli ŭ ciomny čas sutak nie majuć prava pakidać transpartny srodak, nie apranuŭšy śviatłoadbiŭnuju kamizelku, i dzie śpirtnoje zabaroniena pradavać na adlehłaści bližej čym 500 m ad aŭtatras.
U.Navumaŭ taksama zajaviŭ, što MUS "vielmi zakłapočana" pavodzinami na darohach vadzicielaŭ maršrutnych taksi.
Akramia taho, ministr vykazaŭsia za ŭzmacnieńnie pakarańnia za kiravańnie transpartnym srodkam u stanie ałkaholnaha apjanieńnia. Pavodle jaho słoŭ, u 2007 hodzie za paŭtornaje ŭčynieńnie takoha pravaparušeńnia byli asudžany prykładna 100 čałaviek.