Isačoŭ viarnuŭsia ŭ Rečycu
Siońnia ŭ Rečycy ŭ karcinnaj halerei krajaznaŭčaha muzeju prezentavali kataloh pałotnaŭ Alaksandra Isačova. 11 studzienia mastaku spoŭniłasia b 53 hady.
Karcina "U krynicy" |
Ale ŭžo dva dziesiacihodździ, jak jaho niama. Pry žyćci Alaksandra Isačova nie pryznavali.
Na vystavu Isačova ŭ Rečycy ŭdałosia sabrać 35 aŭtarskich tvoraŭ. A ŭ katalohu, jaki napiaredadni vypuściła vydaviectva «Biełaruski knihazbor», pieraličany 324 jahonyja pałatny. Havoryć mastak Aleś Puškin:
«Dziakuj Bohu, što choć 35 tvoraŭ Isačova ŭcaleli i znachodziacca na Biełarusi. Bo, da prykładu, u Maleviča, jaki žyŭ u Viciebsku, nichto ŭ toj čas nie nadumaŭ kupić za niejki miech bulby aryhinał tvoru. Tamu vystava Isačova svoječasovaja, vielmi mocna prahučyć. Taksama cudoŭna, što jość kataloh. Dziakuj arhanizataram!».
Aleś Puškin vučyŭsia z Alaksandram Isačovym u Miensku ŭ Respublikanskaj škole‑internacie pa muzycy i vyjaŭlenčym mastactvie. Jon ličyć, što Isačoŭ pryčyniŭsia da taho, kab biełaruskaje mastactva atrymała šyrokuju viadomaść.
«Dziakujučy pierabudovie, jakuju abviaściŭ Michaił Harbačoŭ u 1985 hodzie, pačali adčyniacca vystavy andehraŭndu ŭ Maskvie i Pieciarburhu. I Biełaruś nia vypała z hetaha kantekstu. Na jahonyja pieršyja vystavy stajali čerhi. Bolš takoha ažyjatažu i viadomaści nia vypała pakul nivodnamu našamu mastaku».
U vydańni katalohu tvoraŭ Alaksandara Isačova ŭdzielničała žonka mastaka Natalla. Jana kaža:
«Heta vieličeznaja praca, i znoŭ‑taki dziakuj daśledčyku Alehu Arłovu. My ź im abjeździli Sankt‑Pieciarburh, byli ŭ Mazyry, Homieli. Rabili zdymki karcin, jakija mahli źniać, dastać. U mianie byŭ śpisavy kataloh Sašavych prac z 1974 hodu, i jon paćviardžaŭsia fotamateryjałami. My adnaŭlali moj fotaarchiŭ, ale ŭžo na novym techničnym uzroŭni. Archiŭ taksama byŭ skradzieny razam ź niekatorymi pracami».
Na vystavie ŭ Rečycy pobač z karcinami Alaksandra Isačova ekspanujucca pracy jahonaha syna — hieafizyka Jarasłava Isačova. 15 studzienia vystava pieramieścicca z Rečycy ŭ Homiel.
***
Alaksandar Isačoŭ naradziŭsia 11 studzienia 1955 hodu ŭ vioscy Azaryčy Kalinkavickaha rajonu Homielskaj vobłaści. Jamu nie było i troch hadoŭ, kali jon, straciŭšy baćku, razam z maci pierajechaŭ u Rečycu. Usio dalejšaje žyćcio Alaksandra paznačana cieniem nieprytulnaści: navučańnie ŭ škole‑internacie ŭ Mazyry, u Respublikanskaj škole‑internacie pa muzycy j vyjaŭlenčym mastactvie, adkul praz čatyry hady jaho vyklučyli.
Uziaŭšy chrost u 19 hadoŭ, Isačoŭ paviartajecca tvaram da Biblii, adkul u jahonyja karciny prychodziać temy Isusa, Majsieja, apostałaŭ.
Pamior Alaksandar Isačoŭ u 32 hady, paśpieŭšy stvaryć amal 400 karcinaŭ.