Ministar Radźkoŭ: Dla pośpiechu ŭ žyćci niekaniečnie mieć vyšejšuju adukacyju
U krainie nie chapaje rabočych kadraŭ i isnuje «pieravytvorčaść specyjalistaŭ z vyšejšaj adukacyjaj», paviedamiŭ 11 studzienia ŭ Miensku žurnalistam ministar adukacyi Alaksandar Radźkoŭ.
Alaksandar Radźkoŭ |
Ministr zaznačyŭ, što jaho viedamstva «aryjentuje kiraŭnictva škoł na toje, što hałoŭnaja zadača adukacyjnaha pracesu nie pastupleńnie vypusknikoŭ u vyšejšyja navučalnyja ŭstanovy, a ŭładkavanaść dziaciej paśla škoły». «Chtości pavinien pastupić u VNU, chtości — u vučylišča, a chtości — pajści pracavać», — ličyć A.Radźkoŭ.
Važna zrazumieć, zajaviŭ ministr, što dla dasiahnieńnia pośpiechu ŭ žyćci nieabaviazkova mieć vyšejšuju adukacyju.
Pavodle słoŭ A.Radźkova, siońnia patrebny adukavanyja rabočyja ź viedańniem ispanskaj, kitajskaj moŭ. Adnak ispanskuju movu ŭ krainie vyvučajuć «tolki 1.700 vučniaŭ». «U nas jość vialikija intaresy ŭ Vieniesuele, Kitai. Rabočyja ź Biełarusi, jakija adpraviacca ŭ Vieniesuełu, pavinny ž tam niejak razmaŭlać. Takim čynam, my stavim zadaču dla bazavaj škoły, kab jaje vypuskniki vałodali na razmoŭnym uzroŭni adnoj ź jeŭrapiejskich ci ŭschodnich moŭ», — zajaviŭ ministr.
Kab rehulavać kolkaść vučniaŭ, jakija iduć u 11‑ty i 12‑ty kłas z metaj pastupleńnia ŭ VNU, A.Radźkoŭ nie vyklučaje prymianieńnia «administracyjnaha resursu z metaj abmiežavańnia kolkaści vučniaŭ, jakija paśla bazavych 10 kłasaŭ buduć praciahvać navučańnie ŭ 11‑ch i 12‑ch kłasach».
Dyrektar Nacyjanalnaha instytuta adukacyi Hienadź Palčyk dapoŭniŭ, što praces pierachodu z bazavaj u siaredniuju škołu «pavinien być kiravany», pakolki možna nadarycca situacyja, «kali ŭ vučyliščy nichto nie budzie iści».
Razam z tym ministr adukacyi vykazaŭ apasieńnie, što kali abmiežavać kolkaść vučniaŭ u 11‑ch i 12‑ch kłasach «z metaj atrymańnia imi rabočych śpiecyjalnaściej u PTV i kaledžach, to mnohija buduć šukać sposaby atrymańnia vyšejšaj adukacyi za miažoj, u Rasii ŭ pryvatnaści».