Aktyvist Maksim Viniarski pačaŭ suchuju haładoŭku
Aktyvist hramadzianskaj kampanii «Jeŭrapiejskaja Biełaruś» Maksim Viniarski 26 studzienia pačaŭ suchuju haładoŭku, paviedamiŭ pravaabarončy resurs spring96.org.
23 studzienia Viniarski byŭ aryštavany na 15 sutak za ŭdzieł u akcyi pamiaci Michaiła Žyźnieŭskaha i hierojaŭ Niabiesnaj sotni kala pomnika ŭkrainskamu paetu Tarasu Šaŭčenku ŭ Minsku.
Akramia taho, pavodle infarmacyi pravaabaroncaŭ, 67-hadovaja Nina Bahinskaja, aštrafavanaja na 3,6 młn. rubloŭ za ŭdzieł u hetaj akcyi, nakiravała ŭ prakuraturu Centralnaha rajona skarhu na dziejańni supracoŭnikaŭ RUUS. Aktyvistka piša, što ŭ milicyi jaje pastavili tvaram da ściany i adabrali pałačku, na prośbu jaje addać i dazvolić sieści nichto nie reahavaŭ.
«Paśla taho jak u dačynieńni da mianie praviali videafiksacyju, adzin z supracoŭnikaŭ Centralnaha RUUS Minska prapanavaŭ aznajomicca z pratakołami administracyjnaha pravaparušeńnia. Na maje zaŭvahi, što ja nie razumieju pratakoły, składzienyja pa-rusku, jon pačaŭ abražać mianie hrubaj niecenzurnaj łajankaj, abražaŭ maju čałaviečuju hodnaść i honar. <…> Adreahavaŭ pahrozami fizičnaj raspravy na moj adras. U pryvatnaści jon skazaŭ, što ja ŭžo staraja i mianie para ŭžo zakapać i jon heta zrobić», — napisała Bahinskaja.