Z Onliner.by sychodzić hałoŭny redaktar Dzianis Blišč
Ab hetym žurnalist paviedamiŭ u svaim Twitter.
Dzianis Blišč
Pa słovach Dzianisa Blišča, siońnia jaho apošni dzień u jakaści hałoŭnaha redaktara papularnaha biełaruskaha partału Onliner.by. «Heta byli krutyja hady, za jakija ja ŭdziačny losu i ŭsim, chto maje dačynieńnie», — piša jon.
Ab pryčynach sychodu i dalejšych płanach jon raspavioŭ ŭ vialikim intervju Marketing.by.
«Kali ja pryjšoŭ u Anłajnier, sajt naviedvała kala 40 tysiač čałaviek na dzień i dobra kali 5 tysiač čytali naviny. Ciapier možna kazać pra toje, što redakcyjny płast na sajcie cikavy trom sotniam tysiač čałaviek štodzień», — kaža jon.
Pryčynaj sychodu jon nazyvaje vysłuhu hadoŭ:
«Niemahčyma być u tonusie, kali siadziš na adnym miescy tak doŭha. Kali ŭjavić čałavieka jak tvorčuju adzinku, to jaho padychody da pracy starejuć razam ź im, kali doŭha-doŭha nie źmianiajecca sutnaść samaj pracy».
Jon dadaje: «Para zrušycca: u mianie kuča idej, jakija ja chaču realizavać, i ŭ farmat Onliner.by jany nie ŭpisvajucca».
Blišč śćviardžaje, što jaho sychod nie źviazany ni z prychodam novaha kiraŭnika Ksienii Šuraŭki, ni z sychodam dyrektara Alaksandra Stelmacha. Ideja pakinuć kampaniju ŭ jaho źjaviłasia daŭno, ale jon nie moh kinuć pracu padčas prajektu «Našyja ŭ Amierycy», a zatym i kryzisu z pazbaŭleńniem domienu.
Imia novaha hałreda Onliner.by stanie viadoma ŭ sakaviku. Pa źviestkach Blišča, kalektyvu prapanujuć pryniać ci adchilić kandydaturu.
Sychodzić z žurnalistyki Dzianis Blišč nie płanuje. «U mianie jość žadańnie pasprabavać novyja padychody da miedyjabiźniesu, — kaža jon. Ja chaču prapanavać ŚMI niešta nakštałt abanienckaha absłuhoŭvańnia, kali ŭmoŭna «darahi» hałoŭny redaktar prapanuje svaje pasłuhi, ale nie źjaŭlajecca štatnym supracoŭnikam».
***
Dzianis Blišč pryjšoŭ na Onliner.by u kastryčniku 2008 hoda, staŭ hałoŭnym redaktaram letam 2009 hoda. Pry im sajt trapiŭ u dziasiatku samych naviedvalnych sajtaŭ Biełarusi, staŭ adnym z samych papularnych anłajn-ŚMI. Viadzie ŭłasny błoh.