Biełarusy Brytanii źviarnulisia da biełaruskaha ambasadara ŭ spravie kniharni «łohvinaŬ»
Apiakunčaja rada Biełaruskaj biblijateki i muzieja imia Franciška Skaryny ŭ Łondanie nakiravała list da ambasadara Respubliki Biełaruś u Vialikabrynii z prośbaj danieści da dziaržaŭnych orhanaŭ kiravańnia Biełarusi «nierazumieńnie i asudžeńnie taho faktu, što prodaž knih u Biełarusi nie prosta nie zaachvočvajecca, a ščylna kantralujecca praź sistemu licenzavańnia», a taksama toje što «heta sistema była ŭžyta nie dla padtrymki rynku i zdarovaj ekanamičnaj aktyŭnaści, a dla źniščeńnia važnaha kulturnaha asiarodka».
Siabry Apiakunčaj rady Skarynaŭskaj biblijateki śćviardžajuć, što «pieraśled kniharni «łohvinaŬ» plamić reputacyju krainy ŭ toj čas, kali Nacyjanalnaja biblijateka Respubliki Biełaruś pry padtrymcy Savietu ministraŭ i Ministerstva kultury namahajecca atrymać ad JUNIESKA abviaščeńnia Minska Knižnaj stalicaj śvietu ŭ 2017 h.»
Napiaredadni razhladu prysudu ŭ Viarchoŭnym sudzie 30 studzienia 2015 h. rada łondanskaj biblijateki zaklikaje nieadkładna vycierci «plamu źniščeńnia hałoŭnaj biełaruskaj kniharni».
Anałahičny zvarot da biełaruskaha ambasadara ŭ Vialikabrytanii dasłała taksama Anhła-biełaruskaje tavarystva.
Voś poŭny tekst zvarotu.
«Šanoŭny spadar Pasoł!
Siabry Apiakunskaj rady Biełaruskaj biblijateki i muzieja imia Franciška Skaryny ŭ Łondanie z tryvohaj i abureńniem daviedalisia pra sudovy vyrak pa spravie kniharni «łohvinaŬ» u Minsku.
U 2014 h. kniharni było šeść razoŭ admoŭlena ŭ vydačy licenzii na raspaŭsiud drukavanaj pradukcyi. Ministerstva infarmacyi nieadnarazova admaŭlała pradastavić kniharni «łohvinaŬ» mahčymaść vypravić niaznačnyja niedakładnaści ŭ dakumientacyi.
U śniežni 2014 h. inśpiekcyja Ministerstva pa padatkach i zborach praviała pazapłanavuju pravierku ŭ kniharni «łohvinaŬ». Inśpiekcyja vyjaviła, što kniharnia zajmajecca realizacyjaj drukavanaj pradukcyi bieź licenzii Ministerstva infarmacyi.
U vyniku, ekanamičny sud Minska aštrafavaŭ ułaśnika kniharni «łohvinaŬ» na 5,4 młn rubloŭ i pastanaviŭ kanfiskavać uvieś dachod, atrymany ŭ studzieni-śniežni 2014 h. – bolš za 960 młn rubloŭ. Heta faktyčna aznačaje, što kniharnia zbankrutuje i spynić svajo isnavańnie.
30 studzienia 2015 adbudziecca słuchańnie abskardžańnia prysudu ŭ Viarchoŭnym sudzie. My – jak i tysiačy inšych biełarusaŭ i ich siabroŭ pa ŭsim śviecie – vielmi spadziajemsia, što rašeńnie sudu dazvolić kniharni «łohvinaŬ» praciahnuć isnavańnie.
Kniharnia źjaŭlajecca krynicaj značnaj častki nabytkaŭ našaj biblijateki. Mnohija z hetych vydańniaŭ my nie znajšli b ni praź dziaržaŭnuju Biełknihu, ni praź inšych pryvatnych kniharaspaŭsiudnikaŭ. Knihami, nabytymi ŭ «łohvinaŬ», karystajucca dzietki škoły ŭ Łondanie – adzinaj na siońnia biełaruskaj škole ŭ zachodniaj Jeŭropie.
My źviartajemsia da Vas z prośbaj danieści da adpaviednych dziaržaŭnych orhanaŭ kiravańnia naša nierazumieńnie i asudžeńnie taho faktu, što prodaž knih u Biełarusi nie prosta nie zaachvočvajecca, a ščylna kantralujecca praź sistemu licenzavańnia. Vypadak z kniharniaj «łohvinaŬ» pakazvaje, što heta sistema była ŭžyta nie dla padtrymki rynku i zdarovaj ekanamičnaj aktyŭnaści, a dla źniščeńnia važnaha kulturnaha asiarodka. Padobnyja złoŭžyvańni padryvajuć davier suajčyńnikaŭ u zamiežžy da dziaržaŭnych orhanaŭ ułady Biełarusi.
Pieraśled kniharni «łohvinaŬ» plamić reputacyju krainy ŭ toj čas, kali Nacyjanalnaja biblijateka Respubliki Biełaruś pry padtrymcy Savietu ministraŭ i Ministerstva kultury namahajecca atrymać ad JUNIESKA abviaščeńnia Minska Knižnaj stalicaj śvietu ŭ 2017 h. Plamu źniščeńnia hałoŭnaj biełaruskaj kniharni treba vycierci nieadkładana!
Z pavahaj,
Siabry Apiakunskaj rady Biełaruskaj biblijateki i muzieja imia Franciška Skaryny:
Ajciec Alaksandr Nadsan, praf. Arnold Makmilin, Džym Dynhli, Ihar Ivanoŭ, dr. Karalina Mackievič, Pavieł Šaŭcoŭ, ajciec Siarhiej Stasievič, dr. Jarasłaŭ Kryvoj».