Kryzis daje šaniec?
Finansava-ekanamičny kryzis nie padšturchnie ŭłady da praviadzieńnia reformaŭ u ekanomicy Biełarusi. Takoje mierkavańnie ŭ intervju «Niamieckaj chvali» vykazaŭ namieśnik staršyni ruchu «Za svabodu» Juraś Hubarevič.
«Za 20 hadoŭ ułada mieła dziesiatki mahčymaściaŭ pačać reformy. Viadoma, pačynać ich varta było nie padčas kryzisu, kali treba ŭžyvać vyratavalnyja miery dla tušeńnia pažaru, jaki vidavočna razharajecca. Byli bolš spakojnyja hady, kali chapała resursaŭ, kab pravieści reformy, ale, na žal, nie było razumieńnia, što heta treba rabić. u vyniku toje, što my siońnia majem, — heta nastupstvy niepradumanaj dziaržaŭnaj palityki. i ja liču, što ciapier usio ž taki ničoha ŭ hetym płanie nie źmianiłasia: razumieńnia i, hałoŭnaje, voli da ažyćciaŭleńnia ŭ biełaruskaj ekanomicy reformaŭ, jakija nieparyŭna buduć źviazanyja z refarmavańniem palityčnaj sistemy, u siońniašnich uładaŭ niama. Jany prosta sprabujuć niejak pieražyć hety čas, kab i nadalej zachoŭvać siabie va ŭładzie», - kaža palityk.
Inicyjatary kampanii «Narodny refierendum», kudy ŭvachodziać Partyja BNF, ruch «Za svabodu», kampanija «Havary praŭdu!» i Biełaruskaja sacyjał-demakratyčnaja partyja (Hramada), 15 studzienia ŭ sumiesnaj zajavie zaklikali pałatu pradstaŭnikoŭ da praviadzieńnia reformaŭ. U pryvatnaści, pradstaŭniki demsił zaklikali ŭnieści ŭ paradak dnia pazačarhovaj siesii parłamienta pytańnie pra mahčymaść inicyjavać praviadzieńnie respublikanskaha refierendumu pa pytańniach, prapanavanych hramadzianami ŭ miežach kampanii «Narodny refierendum».
Ju. Hubarevič nahadvaje, što ŭ pieršy raz inicyjatary «Narodnaha refierendumu» źviarnulisia da deputataŭ jašče 2 kastryčnika: u pieršy dzień vosieńskaj siesii jany pieradali ŭ pałatu pradstaŭnikoŭ podpisy 50 tys. hramadzian Biełarusi za praviadzieńnie respublikanskaha refierendumu. Adnak nijakaj reakcyi na toj zvarot tak i nie było. Demsiły i ciapier nie ŭskładajuć na deputataŭ jakich-niebudź nadziej.
«My bačym, što pałata pradstaŭnikoŭ ŭsialak paćviardžaje svoj status maryjanietkavaj. Deputaty pryznačajucca, a nie vybirajucca, tamu jany nie cikaviacca prablemami ludziej, jakija padpisalisia ŭ padtrymku «Narodnaha refierendumu». Ale my nie źbirajemsia spyniacca. Nastupny krok - pryciahnuć jak maha bolš ludziej u padtrymku samoj idei, praciahvać zbor podpisaŭ», - raspavioŭ Ju. Hubarevič.
Pytańni, sfarmulavanyja ŭ miežach kampanii «Narodny refierendum», choć naŭprost i nie tyčacca ekanamičnych reformaŭ, ale tak ci inakš hetuju śfieru zakranajuć. Pytańni ab abrańni miascovych kiraŭnikoŭ pramym hałasavańniem hramadzian, kampiensacyi ŭkładaŭ, stračanych paśla devalvacyi 2011 hoda, majuć na ŭvazie biudžetnuju reformu i adpaviednaje pieraraźmierkavańnie srodkaŭ, adznačaje Ju. Hubarevič.
«My ciapier jakraz pracujem nad bolš hłybokim napaŭnieńniem kožnaha z pytańniaŭ, kab heta byŭ nie tolki radok u biuleteni, ale i kankretnaja prahrama reformaŭ, kankretnyja praktyčnyja kroki, jakija pavinien zrabić urad, paśla taho, jak adpaviednaje rašeńnie budzie pryniata na ahulnabiełaruskim refierendumie», - adznačyŭ palityk.
Havoračy ab situacyi ŭ cełym, Ju. Hubarevič adznačaje, što ŭłada ciapier znachodzicca ŭ davoli składanym stanoviščy.
Z adnaho boku, siarod nasielnictva vialikaje imknieńnie da pieramienaŭ: tak, pavodle vynikaŭ apytańnia, praviedzienaha Biełaruskim instytutam stratehičnych daśledavańniaŭ (BISS, Vilnia) u ramkach prajekta «Reforum», u cełym siarod nasielnictva Biełarusi ideju reformaŭ padtrymlivajuć 76%, siarod dziaržsłužačych - 86%, siarod pradstaŭnikoŭ biznesu - 98%.
Ź inšaha boku, ekanamičnaja situacyja ŭ krainie zaraz paharšajecca: «Ekanamičny kryzis, jaki jany chacieli schavać, siońnia vidavočny: heta 30-pracentnaja devalvacyja, pavyšeńnie koštaŭ na tavary i t. D. I z usim hetym ŭłada sutyknułasia ŭ hod prezidenckich vybaraŭ. Faktyčna u ich jość 8-9 miesiacaŭ, kab stabilizavać ekanomiku i pakazać choć niejkija pośpiechi «.
Pa słovach palityka, ciapierašni kryzis stvaraje šaniec dla biełaruskaj apazicyi. Demakratyčnyja siły pavinny tłumačyć ludziam, chto sapraŭdny vinoŭnik taho, što ich zarobki abiascenilisia.
«My pavinny tłumačyć, čamu hety kryzis nosić sistemny charaktar. Heta (sistemny charaktar kryzisu. - zaŭvaha. A. Š.) abumoŭlivajecca, z našaha punktu hledžańnia, tym, što siońniašniaja ŭłada ŭ adnabakovym paradku aryjentavana na JEAES, rynak jakoha znachodzicca ŭ kryzisie, bo asnoŭny hulec hetaha rynku - Rasija - znachodzicca pad mižnarodnymi sankcyjami. Heta budzie zaciažny kryzis, i nam treba pieraaryjentavać našu ekanomiku, raźvivać supracoŭnictva ź jeŭrapiejskimi krainami, vychodzić na rynki ES. Heta jakraz tyja temy, jakija pavinny abmiarkoŭvacca ŭ hramadstvie, i palityki pavinny pradstavić alternatyŭny padychod da siońniašniaj ekanamičnaj palityki», — padkreślivaje Ju. Hubarevič.