«Reparciory bieź miežaŭ»: uzrovień svabody ŚMI rezka ŭpaŭ
Pavodle dakładu mižnarodnaj arhanizacyi «Reparciory bieź miežaŭ», u 2014 hodzie ŭmovy raboty žurnalistaŭ pahoršylisia ŭ bolšaści krain.
Najlepšaja situacyja sa svabodaj presy ŭ Finlandyi, Narviehii, Danii, Niderłandach i Šviecyi (pieršyja 5 miescaŭ rejtynhu adpaviedna). Najhoršaja — u Kitai, Siryi, Turkmienistanie, KNDR i Erytrei.
Najvialikšaje paharšeńnie ŭmoŭ pracy ŚMI nazirałasia ŭ 2014 hodzie ŭ kryzisnych rehijonach, siarod jakich Bližni Uschod, Irak, Siryja i Ukrajina. Najbolšaje padzieńnie ŭ rejtynhu pakazali Andora (32 miesca, minus 27 pazicyj), Uschodni Tymor (103 miesca, minus 26) i Konha (107 miesca, minus 25), a taksama Italija (73 miesca, minus 24).
Rejtynh Ukrainy paniziŭsia na 2 pazicyi, ciapier jana zajmaje 129 miesca siarod 180 krain.
Padčas pratestaŭ na Majdanie, a zatym padčas kanfliktu na paŭdniovym uschodzie suprać žurnalistaŭ nie raz užyvałasia siła. 6 žurnalistaŭ i «hramadzian internetu» (netizen) byli zabityja. Novy ŭrad pačaŭ padtrymku niezaležnaha hramadskaha viaščańnia, ale vajna adsunuła demakratyčnyja reformy na druhi płan. Stvareńnie Ministerstva infarmacyi «Reparciory bieź miežaŭ» razhladajuć jak žadańnie kantrolu ŚMI. Niekatoryja žorstkija zakonaprajekty byli adzilenyja ŭ apošniuju chvilinu, ale niama ŭpeŭnienaści ŭ tym, što nie buduć pryniatyja novyja, bolš žorstkija zakony.
Rasija straciła ŭ rejtynhu 4 pazicyi i apynułasia na 154 miescy.
Pa mierkavańni «Reparcioraŭ bieź miežaŭ», rasijskaje TV praciahvaje tapić hledača ŭ prapahandzie. Ukrainski kryzis pryvioŭ da pavieličeńnia cisku na niezaležnyja ŚMI, błakirovak sajtaŭ, novych žorstkich zakonaŭ. Klimat staŭ niespryjalnym dla tych, chto krytykuje novy patryjatyčny nieakansiervatyŭny dyskurs, u niekatorych rehijonach miascovyja ŭłady karystajucca tym dziela pieraśledu svaich krytykaŭ. Za hod u Rasii byŭ zabity adzin žurnalist.
U Biełarusi ŭsio stabilna — 157 miesca z 2012 hoda.
Biełaruś u rejtynhu znachodzicca miž Irakam i Jehiptam, u troch pazicyjach ad «čornaj dvaccatki» (krain z najhoršaj situacyjaj). Nivodzin žurnalist pavodle źviestak «Reparcioraŭ bieź miežaŭ» nie zahinuŭ za 2014 hod. Ahulny rejtynh niaznačna źniziŭsia na 0,16 bała da 44,66 bałaŭ. Apisańnia padziej u Biełarusi nie dajecca ni ŭ dakładzie, ni ŭ padrabiaznaściach pa krainie. Vidavočna, arhanizacyja nie ličyć istotnymi papraŭki ŭ zakon ab ŚMI, što pryraŭniali da ŚMI internet-sajty, unieśli adkaznaść ŚMI za kamientary na forumach, a taksama zahadkavyja błakiroŭki sajtaŭ BiełaPAN, naviny.by, «Biełaruskaha partyzana», «Chartyi-97» i inšych (vinavatyja ŭ błakiroŭkach zastalisia nieviadomymi).
Polšča ličycca dastatkova svabodnaj i zajmaje 18 miesca (+1 u rejtynhu), Litva i Łatvija na 31 i 28 miescach adpaviedna.
Francyja za 2014 hod padniałasia ŭ rejtynhu na adnu pazicyju ŭvierch i ciapier zajmaje 39 miesca. Ale na pačatku 2015 hoda kraina pieražyła sapraŭdnuju trahiedyju.
Radykalnyja isłamisty rasstralali redakcyju humarystyčnaha časopisu Charlie Hebdo, zatym adbyłasia sieryja teraktaŭ na roznych kancach krainy.
Udzielnikaŭ minskaha pikietu ŭ padtrymku Charlie Hebdo musili sudzić za parušeńnie paradku praviadzieńnia masavych akcyj, ale paśla daručeńnia Łukašenki «razabracca ź situacyjaj» sud byŭ admienieny.
Čytajcie taksama:
Što nasamreč adbyvajecca ŭ Francyi? Biełarusy z Paryža
Piać sposabaŭ trapić na zabłakavanyja sajty