Advakat: Sprava Saŭčanki zavieršycca pracesualnym sposabam
Ukrainskuju lotčycu Nadzieju Saŭčanku ŭ Rasii mohuć vyzvalić ź SIZA, zaviaršyŭšy spravu pracesualnym sposabam.
Takuju vysnovu možna zrabić z karotkaha kamientara jaje advakata Marka Fiejhina ŭ Twitter.
«Situacyja prajaśniłasia. Sprava Saŭčanki farmalna praciahniecca. Jana zavieršycca pracesualnym sposabam. Choć nievinavataść Saŭčanki vidavočnaja», — napisaŭ Fiejhin.
Pry hetym «Meduza» sa spasyłkaj na rasijski «Interfaks» piša, što Fiejhin abvierh paviedamleńni ab chutkim vyzvaleńni jaho padabaronnaj.
«Maja krynica, jakaja viedaje sutnaść pieramovaŭ pa Nadziei, usio ž skazała, što jana nie patrapiła ŭ śpisy pa abmienie «ŭsich na ŭsich», — skazaŭ Fiejhin.
A «Russkoj słužbie novostiej» jon skazaŭ: «Nieaficyjna mnie paćviardžajuć z Kijeva, što nibyta dasiahnutaja damoŭlenaść ab abmienie, i jana (Saŭčanka) ŭklučanaja ŭ śpisy. Heta nieaficyjnaja infarmacyja, ja nie bačyŭ hetych śpisaŭ, treba papieru ŭbačyć, što za podpisy stajać. Ale heta nadziejnaja krynica».
«U ramkach «narmandskaha farmatu», u ramkach minskich pahadnieńniaŭ adnym z punktaŭ budzie abmien, i jana ŭklučanaja ŭ abmien», — skazaŭ advakat.
Jon adznačyŭ, što zajaŭ rasijskich aficyjnych asob z nahody dalejšaha raźvićcia spravy Saŭčanki pakul nie było.
Raniej u čaćvier, 12 fievarla, prezident Ukrainy Piatro Parašenka zajaviŭ ab damoŭlenaści adnosna vyzvaleńnia ŭkrainskaj lotčycy i narodnaha deputata Nadziei Saŭčanki ź SIZA.