U redaktara sajta «Naš Mahiloŭ» zabrali try kampjutary
abnoŭlena
Ihar Barysaŭ, fota www.bsdp.org.
Na kvateru da Ihara Barysava ranicaj 12 sakavika pryjšli 6 milicyjantaŭ. U ich była pastanova na ahlad pamiaškańnia.
Jak paviedamiŭ mahiloŭski žurnalist Aleś Burakoŭ, sprava tyčycca materyjału na sajcie «Naš Mahiloŭ» «Dyrektar AAT «Stužka» prajhraŭ u kazino kvateru i akcyi pradpryjemstva».
Tekst byŭ apublikavany jašče 8 studzienia 2015. Hiendyrektar pradpryjemstva napisaŭ zajavu za paklop u milicyju. Pryznačyli pravierku.
Z kvatery Barysava zabrali try kampjutary, madem i natatnik. Paśla milicyjanty skiravalisia na pryvatnuju kvateru, jakuju pad ofis vykarystoŭvajuć pravaabaroncy-viasnoŭcy. Pracuje adtul i Barysaŭ.
Pa słovach Alesia Burakova, kali pravaabaroncy pryjechali na kvateru ad Barysava, na ŭvachodzie ich užo čakali tyja ž milicyjanty z rabotnikami ŽKH. Jany majuć namier zabrać kampjutary ŭ miežach kryminalnaj spravy za paklop.
Iharu Barysavu 32 hady. Jon skončyŭ Biełaruska-rasijski ŭniviersitet u Mahilovie i EHU ŭ Vilni. Pa adukacyi — inžynier-elektryk i palitołah. Źjaŭlajecca namieśnikam staršyni Biełaruskaj sacyjał-demakratyčnaj partyi (Hramada). Žanaty, haduje dačku.
Sajt «Naš Mahiloŭ» paŭstaŭ na bazie adnajmiennaj haziety. Ale paśla 73 numaroŭ papiarovaje vydańnie pierastała vychodzić, a sajt praciahnuŭ pracu. Z 2009 pa 2011 nie funkcyjanavaŭ. Na sajcie pišuć pra naviny horada, jaho prablemy. Nie abminajuć i palityčnyja temy. Materyjały drukujucca na ruskaj i biełaruskaj movach.