Narodnyja hrošy dla knihi narodnaha paeta
Niezaležnaje vydaviectva «Knihazbor» abviaściła zbor srodkaŭ na vydańnie knihi «Vybranyja tvory» Ryhora Baradulina.
Ryhor Baradulin |
Niezaležnaje vydaviectva «Knihazbor» abviaściła zbor srodkaŭ na vydańnie knihi «Vybranyja tvory» Ryhora Baradulina.
Heta čarhovy tom seryi «Biełaruski knihazbor», jaki zaplanavany da druku sioleta. Udzieł u vydańni knihi narodnaha paeta Biełarusi, vyłučenca na Nobeleŭskuju premiju, moža ŭziać kožny nieabyjakavy čałaviek.
«Vybranyja tvory» Ryhora Baradulina buduć 42‑tomam u seryi «Biełaruski knihazbor». Raniej vyjšli knihi Janki Kupały, Łarysy Hienijuš, Janki Bryla j inšych klasykaŭ biełaruskaj litaratury. Zbor srodkaŭ abvieščany ŭpieršyniu. Voś jak heta tłumačyć dyrektar niedziaržaŭnaha vydaviectva Hienadź Viniarski:
«Kab jaje mahli nabyć i studenty, i vykładčyki, u jakich nia vielmi vialiki zarobak, nieabchodna źnižać sabiekošt hetaj knihi. A sabiekošt možna źnizić tolki achviaravańniami. Raniej lahčej było znajści fundataraŭ. Zaraz — usio ciažej i ciažej. Tamu my vyrašyli pajści hetkim šlacham».
Aŭtar knihi, paet Ryhor Baradulin, hetak prakamentavaŭ inicyjatyvu vydaviectva:
«Biezumoŭna, chaciełasia b, kab u takoj pavažnaj seryi knižka vyjšła. Nu, a zbor srodkaŭ — nu što ž…. Niedziaržaŭnyja vydaviectvy — jany ž tak i pracujuć».
Zvaroty da hramadzkaści ab zbory srodkaŭ na drukavańnie knih viadomych aŭtaraŭ u Biełarusi — źjava nia novaja. Hetak ža knihu Vasila Jakavienki vydavaŭ ekalahičny źviaz «Čarnobyl», tvory Anatola Sysa taksama vydadzienyja na srodki hramadzkaści. Voś jak heta prakamentavaŭ namieśnik staršyni Sajuzu biełaruskich piśmieńnikaŭ Barys Piatrovič:
«Hetak adbyvajecca z‑za našaj biednaści i z‑za našaj sytuacyi. Bo ŭsiudy hetym zajmajecca dziaržava i navat idzie papieradzie. A ŭ nas dziaržaŭnyja vydaviectvy nie zajmajucca vydańniem tvoraŭ peŭnych aŭtaraŭ. Tamu ŭ 90‑ch hadach na tuju ž samuju «Ścianu» Vasila Bykava hetaksama źbiralisia srodki. Tady abviaščałasia, što hety prajekt budzie praciahvacca, što buduć vychodzić novyja knihi, ale jon pierapyniŭsia. Niezaležnym vydaviectva ciažka samastojna vydavać takuju litaraturu. I tamu ja tolki vitaju inicyjatyvu «Knihazboru». U nas cikavaja litaratura, u nas jość što vydavać. Dobra budzie kali hety prajekt nie pierapynicca, a budzie praciahvacca i nadalej. Dumaju, što naš biełaruski narod pavinny padtrymać hetuju ideju».
Dyrektar «Knihazboru» Hienadź Viniarski paviedamiŭ, što ŭsie achvotnyja pryniać udzieł u hetaj važnaj dla biełaruskaj kultury spravie, mohuć źviartacca na telefon vydavieckaha pradpryjemstva «Knihazbor» 204‑86‑97.