Paralizavanaja praca punktaŭ propusku na biełaruska‑polskaj miažy
Ź siońniašniaj ranicy strajkujuć polskija mytniki. Biełarusam nie rekamendujuć jechać u Polšču, a palakam — u Biełaruś.
Načalnik pres‑słužby Dziaržaŭnaha pamiežnaha kamiteta Alaksandr Ciščanka raspavioŭ Jeŭraradyjo pra situacyju na biełaruska‑polskaj miažy:
«Na punktach propusku «Damačava» i «Varšaŭski most» polskija mytniki zabłakavali punkty propusku. Na astatnich punktach propusku farmalna pa adnym mytniku. Tam idzie afarmleńnie vielmi marudna, prapuskajuć pa adnoj mašynie».
Pryčym, jak stała viadoma Jeŭraradyjo, prapuskajuć pieravažna mašyny, jakija nie patrabujuć mytnaha afamleńnia, naprykład, dypłamatyčnyja.
U Dziaržaŭnym pamiežnym kamitecie Biełarusi pakul nie viedajuć, jakija patrabavańni ŭ polskich mytnikaŭ i jak doŭha moža praciahvacca ich akcyja. Z polskaha boku nie pastupała nijakich aficyjnych dakumientaŭ albo zajavaŭ.
Voś jakija parady daje hramadzianam našaj krainy pamiežny kamitet. Havoryć Alaksandr Ciščanka:
«My pakul rekamiendujem hramadzianam, jakija źbiralisia jechać u Polšču, admovicca ad pajezdak u bližejšy čas. Inakš možna patrapić u niepryjemnuju situacyju z tymi samymi čerhami. Nakolki ja viedaju, palakaŭ, jakija źbirajucca ŭjazdžać u Biełaruś, ich polskaja mytnia papiaredžvaje, što jany mohuć nie viarnucca…»
Mytniki rekamiendujuć karystacca čyhunačnym transpartam, jaki pakul afarmlajecca ŭ zvyčajnym režymie. Adnak što budzie dalej — nieviadoma.
Nahadajem, raniej strajk byŭ na ŭkrainskim učastku polskaj miažy, ciapier jon pierakinuŭsia na biełaruski ŭčastak. Čerhi na ŭkrainska‑polskaj miažy raściahvalisia na dziesiatki kiłamietraŭ.