Anatol Labiedźka: Parsiuki ŭ maich baćkoŭ lepš jaduć, čym my na Akreścina
Siońnia na svabodu sa specpryjomniku-raźmierkavalniku vyjšaŭ Anatol Labiedźka, a ź im jašče 22 čałavieki.
Pieršym bramu izalatara pakinuŭ staršynia AHP Anatol Labiedźka, za im vyjšli jašče 22 čałavieki.
«Niahledziačy na toje, što viaźniaŭ pačali vypuskać daterminova, padtrymać nas pryjechała bahata ludziej. Heta było pryjemna navat dla mianie, jaki siadzieŭ tut užo šosty ci siomy raz. A što kazać pra maładych chłopcaŭ, jakija apynulisia na Akreścina ŭpieršyniu. My dačakalisia pakul vyjdzie apošni — Michaił Paškievič. U dvary specpryjomniku stajali mašyny z AMAPam, ale my ŭsio adno prahukali «Žyvie Biełaruś!» Praz kraty ŭ voknach bačyli Alesia Taŭstyku i Aleha Korbana», — raskazvaje A. Labiedźka.
Pavodle słovaŭ lidera AHP, umovy na Akreścina ad času jahonaj minułaj adsidki nie palepšylisia. «Samaje strašnaje — heta choład pa načach. Spać mahčyma tolki, kali apranieš troje štanoŭ i švedraŭ, «metadam kapusty». Kolki maje siabry i rodnyja sprabavali pieradać spalnik, u ich jaho nie ŭziali. Nielha prynosić i ježu. Što da turemnaha charčavańnia, to navat parsiuki ŭ maich baćkoŭ majuć lepšy racyjon. Prykładna kožnuju čaćviortuju pajku ja nia jeŭ. Adzinaje dobraje — adramantavali duš. Uvohule, my ź siabrami pastanavili pačać «ačałaviečvańnie» Akreścina. Pavodle praviłaŭ nas pavinny vyvodzić na prahułku na vulicu, dazvalać pieradavać bializnu i h.d. Užo źbirajemsia pieradać taki zvarot u prakuraturu», — kaža palityk.
Raskazaŭ jon i pra dopyty, jaki adbyvalisia ŭ specpryjomniku paśla akcyi 10 studzienia. «U subotu 12 studzienia na Akreścina da nas pryjechała cełaja bryhada śledčych. Kiravaŭ imi načalnik śledčaha adździełu HUUS Mienharvykankamu padpałkoŭnik Michalčyk. Mienavita jon i dapytvaŭ mianie, amal hadzinu. Raskazaŭ, što zaviedzienaja kryminalnaja sprava pa faktu niedazvolenaj vuličnaj manifestacyi. Dapytali i ŭsich astatnich zatrymanych u toj dzień. Ciapier usie my prachodzim pa hetaj kryminalnaj spravie śviedkami», — skazaŭ A.Labiedźka.
Na Akreścina ŭsio jašče praciahvaje znachodzicca bolš za 20 palitviaźniaŭ.