Rasieja admaŭlajecca ad radaraŭ za miažoj

U pieršuju čarhu heta datyčycca arendy ŭkrainskich RŁS, a paśla ŭsich «inšaziemnych» radaraŭ.

Kaśmičnyja vojski Rasiei planujuć admovicca ad karystańnia ŭsimi radyjolakacyjnymi stancyjami (RŁS), jakija znachodziacca za jaje miežami. Pra heta paviedamiŭ na pres‑kanferencyi kamandujučy Kaśmičnymi vojskami Rasiei hienerał‑pałkoŭnik Ŭładzimier Papoŭkin.

U pieršuju čarhu heta datyčycca arendy ŭkrainskich RŁS, a paśla ŭsich «inšaziemnych» radaraŭ. Rašeńnie źviazanaje z tym, što «ŭsie RŁS, jakija znachodziacca ŭ krainach byłoha Savieckaha Sajuzu, zaležać ad voli dziaržaŭ — Ukrainy, Azerbajdžana, Kazachstana, Biełarusi. Tamu my budziem admaŭlacca ad usich stancyjaŭ, jakija mieściacca za miažoj, nia chočam zaležyć ad tych dziaržaŭ, u jakich jany znachodziacca,» — zajaviŭ Papoŭkin.

Pavodle jaho słovaŭ, Rasieja nia moža być upeŭniena pierš za ŭsio ŭ RŁS va Ŭkrainie, tamu što ich absłuhoŭvajuć cyvilnyja specyjalisty, a nie vajskoŭcy. Radary moža spynić lubaja dyversija, da taho ž Rasieja nia moža poŭnaściu vieryć ich pakazańniam. «U Biełarusi i Kazachstanie pracujuć našy hramadzianie, a va Ŭkrainie za RŁS adkazvaje nacyjanalnaje kaśmičnaje ahienctva Ŭkrainy. Jakaja tut moža być dakładnaść?» — kaža rasiejski hienerał.

Taksama siońnia Dziaržaŭnaja duma Rasiei denansavała Damovu pamiž uradami Rasiei i Ŭkrainy ab srodkach system papiaredžańnia ab rakietnym napadzie i kantrolu kaśmičnaje prastory ad 28 lutaha 1997 hodu. Ministar abarony Rasiei Anatol Sierdziukoŭ padpisaŭ rašeńnie ab admovie ŭ arendzie RŁS u Sievastopali i Mukačova.

Jarasłaŭ Ściešyk, pavodle zamiežnaje presy

Kamientary da artykuła