Dzień Voli ŭ Taronta prajšoŭ z razmacham
U niadzielu, 29 sakavika, siabry Zhurtavańnia Biełarusaŭ Kanady adznačali Dzień Voli.
Paśla ŭračystaj bahasłužby i abiedu ŭ siabroŭskim kole byli začytanyja vinšavańni, što nadyšli ŭ ZBK z nahody śviata.
Surjoznyja i hłybokija histaryčnyja lekcyi byli azdoblenyja žvavym vystupam tarontaŭskaha śpieŭnaha hurtu «Javarovy ludzi».
Pieršy dakład prezientavała kandydat histaryčnych navuk Halina Siarhiejeva (u minułym — starejšy navukovy supracoŭnik Instytuta historyi Akademii navuk Biełarusi). Spadarynia Halina nie tolki raspaviała pra histaryčnyja padziei, što datyčylisia hetaj pamiatnaj daty, ale i pra ichnyja nastupstvy, uździejańnie na dalejšuju historyju Biełarusi, ažno da našych časoŭ.
Druhi dakład ładziŭ Pieršaijerarch Biełaruskaj Aŭtakiefalnaj Pravasłaŭnaj Carkvy, Archijepiskap Navahradski i Paŭnočnaamierykanski Śviatasłaŭ.
Z vykarystańniem histaryčnych mapaŭ jon raspavioŭ pra toje, jak praz stahodździ razam išli biełaruski narod, biełaruskaja dziaržava (ad staražytnych kniastvaŭ da sučasnaje Biełarusi) i biełaruskaja Carkva. Na žyvych prykładach jon davodziŭ, jak sa źmienami miežaŭ dziaržavy dy ŭładaŭ, źmianialisia miežy dy žyćcio nacyjanalnaje Carkvy, jak ciesna paviazanyja losy Baćkaŭščyny j Carkvy.
Pamiž dvuma histaryčnymi raspoviedami šmat radaści i viasnovaha nastroju prynieśli śpievy biełaruskaha kanadskaha hurtu «Javarovy Ludzi».
Usie ŭ zali tak pračulisia miłahučnymi biełaruskimi narodnymi śpievami dy aktorskim talentam hurtu, što ŭ karahod razam z «Javarovymi ludźmi» stali amal usie prysutnyja – i stary, i mały.
Pa skančeńni śviata siabry jašče doŭha nie razychodzilisia, viadučy havorku na rodnaj movie, čaho časam tak nie staje na emihracyi.