Amierykanskija bataljony ŭ Biełastoku i Vilni — pahroza dla Biełarusi?
Andrej Paratnikaŭ: «Biełaruskija ŭłady nie reahujuć, tamu što nijakaj pahrozy hetyja kałony dla našaj biaśpieki nie ŭjaŭlajuć.
«Rejd drahunaŭ» praz Estoniju, Łatviju, Litvu i Polšču.
U Jeŭropie praciahvajucca vialikija amierykanskija vajskovyja manieŭry pad hučnaj nazvaj «Atłantyčnaje rašeńnie». Vučeńni achoplivajuć terytoryju ad Finlandyi pa Hruziju. Meta apieracyi — prademanstravać sajuźnikam padtrymku i adbić u patencyjnaha ahresara žadańnie atakavać uschodni fłanh NATO.
Amierykanskija viertaloty «AH-64» prybyvajuć u Vilniu ŭ ramkach vučeńniaŭ.
Prezientacyja techniki, uśmieški, fotazdymki na pamiać. Sotni žycharoŭ Biełastoku ciopła vitali amierykanski vajskovy kanvoj, jaki ŭpieršyniu ŭ historyi naviedaŭ stalicu Padlašša — rehijona, dzie žyvuć taksama etničnyja biełarusy.
Tysiačy ludziej vitali amierykancaŭ u Biełastoku.
Čechi vitajuć amierykanski kanvoj kala Bahumina, Maravija.
Kapitan armii ZŠA Raseł Mur zaznačaje: «Heta apieracyja nazyvajecca «Rejd Drahunaŭ». Dla nas vielmi važna što takim čynam my možam prajechać amal 2000 km. Drahuny — tak trysta hadoŭ tamu nazyvali piachotu jakaja pieramiaščałasia na koniach. Takuju mianušku maje amierykanskaja kavaleryja — motapiachotnyja častki, jakija svaim chodam viartajucca z Estonii ŭ Niamieččynu».
Žychary Prahi vitajuć amierykanskich sałdat.
Čechija była adzinaj uschodniejeŭrapiejskaj krainaj, dzie nie ŭsie vitali amierykanski rejd, byli i pratesty. U adroźnieńnie ad Polščy, Litvy, Łatvii i Estonii, u Čechii praciahvaje isnavać Kamunistyčnaja partyja, i jana źbiraje kala 15—20% hałasoŭ.
Julijuš Sabak, vajskovy ekśpiert partału Defence24.pl, kaža: «Apieracyja «Rejd Drahunaŭ» maje dźvie mety. Pa-pieršaje sihnalizuje, što amierykancy prysutničajuć, jany bačnyja, padtrymlivajuć sajuźnikaŭ na Uschodzie».
Havorka idzie pra prybałtyjskija dziaržavy i Polšču, jakija adčuvajuć pahrozu z boku Rasiei. Heta ŭschodni fłanh NATO.
«Ale jość i taktyčnaja meta. Heta test transpartnych i kamunikacyjnych mahčymaściaŭ amierykanskich siłaŭ, bo ŭ vypadku pahrozy im pryjdziecca pieramiaščacca suchaputnym šlacham. Jon našmat chutčejšy i biaśpiečniejšy, čym marski šlach pa Bałtycy».
Biełastok — tolki adzin prypynak. 90 bronietransparcioraŭ «Strajkier» i niekalki socień vajskoŭcaŭ jeduć dalej uzdoŭž biełaruskaj miažy, na poŭdzień. Heta častka vialikich vučeńniaŭ amierykanskaj armii ŭ Jeŭropie — «Atłantyčnaje rašeńnie». Manieŭry byli pryznačanyja paśla ahresii Rasiei suprać Ukrainy ŭ Krymie i na Danbasie.
Čamu niama reakcyi aficyjnaha Miensku na amierykanskija vojski za 50 kiłamietraŭ ad biełaruskaj miažy?
Andrej Paratnikaŭ, vajskovy ekśpiert z Belarus Security Blog, kaža, što heta naturalna: «Biełaruskija ŭłady nie reahujuć tamu što nijakaj pahrozy hetyja kałony dla našaj biaśpieki nie ŭjaŭlajuć. Heta niešmatlikija vajskovyja adździeły, bataljon ci dva maksimum. Jany navat nie ŭmacoŭvajuć biaśpieki krain, dzie jany raźmieščanyja. Heta prosta simvał taho, što ŭ vypadku destabilizacyi ci ahresii Złučanyja Štaty hetym razam u baku ŭžo nie zastanucca. Heta dakazvaje i prybyćcio pad Varšavu batarei «Petryjot», upieršyniu z bajavymi rakietami, dla ŭdziełu ŭ vučeńniach z polskimi vajskoŭcami».
Styvien Mał, pasoł ZŠA u Polščy, kazaŭ: «Siońnia my demanstrujem mahčymaść chutkaha raźmiaščeńnia rakietaŭ «Petryjot» u Polščy, kali budzie takaja patreba. My tut kab pakazać našym polskim sajuźnikam, što amierykanskija harantyi biaśpieki ŭ ramkach NATA značać bolej, čym słovy na papiery. Udzielniki NATA ŭsprymajuć ataku na adnaho z sajuźnikaŭ jak ataku na ŭsich».
Žychary estonskaha horad Piarnu ahladajuć amierykanskuju techniku.
Julijuš Sabak adznačaje, što «prysutnaść «Petryjotaŭ» u suviazi ź vialikaj kolkaściu rasiejskaj avijacyi u Kalininhradzie — heta važny sihnał. Raniej u Polščy byli Petryjoty ale biez rakietaŭ ci z vučebnami rakietami. Palakam — nie da žartaŭ. Ichnaja supraćpavietranaja abarona składajecca z savieckich rakiet i mocna sastareła. Rasieja moža chutka pierakinuć u Kalininhradskuju vobłaść taktyčnyja rakiety «Iskander» i tady, biez amierykanskaj padtrymki, Varšava zastajecca biezabaronnaju».
Julijuš Sabak dadaje, što pryvoz batarei «Petryjot» — «heta taksama elemient rekłamy sistemy «Petryjot», jakaja ŭdzielničaje u tendary na polskuju sistemu supraćpavietranaj abarony «Visła».