Viciebčukoŭ pakarali sutkami za vyviešany ściah
Barys Chamajda atrymaŭ 13 sutak, a Alaksandar Sałaŭjan – 12.
Barysa Chamajdu i Alaksandra Sałaŭjana zatrymali ŭ aŭtorak na vulicy Cieraškovaj. Ich źvinavacili ŭ praviadzieńni niesankcyjanavanaha pikietu z vyviešvańniem bieł-čyrvona-biełaha ściaha. Na zahad načalnika Kastryčnickaha RUUS Andreja Prakapoviča da sudu zatrymanych źmiaścili ŭ izalatar časovaha ŭtrymańnia. U sieradu sud pieranieśli, bo Alaksandar Sałaŭjan zapatrabavaŭ pradstavić jamu pierakładčyka. Jaho padtrymaŭ i Barys Chamajda. Siońnia, jak paviedamiŭ viciebski pravaabaronca Leanid Śviecik, A. Sałaŭjan admoviŭsia adkazvać na pytańni sudździ Iryny Smalakovaj. B. Chamajda na pytańni adkazvaŭ, jon nie chavaŭ taho, što vyviešvaŭ na vulicy ściah. U vyniku pavodle art. 23.24 KaAP apazycyjanistaŭ źvinavacili ŭ arhanizacyi i praviadzieńni niesankcyjanavanaha mierapryjemstva. Barys Chamajda atrymaŭ 13 sutak, a Alaksandar Sałaŭjan – 12.