Polskija kiroŭcy admovilisia ad blakady
Niahledziačy na pravał učorašnich pieramovaŭ, častka mytnikaŭ vyjšła na pracu. Pavodle polskich ŚMI, najlepš sytuacyja vyhladaje na pierajeździe Karoščyn‑Kazłovičy.
Niahledziačy na pravał učorašnich pieramovaŭ, častka mytnikaŭ vyjšła na pracu. Pavodle polskich ŚMI, najlepš sytuacyja vyhladaje na pierajeździe Karoščyn‑Kazłovičy.
Kiraŭnik Ahulnapolskaha źviazu pracadaŭcaŭ darožnaha transpartu Balasłaŭ Mileŭski paviedamiŭ, što kiroŭcy TIR‑aŭ admaŭlajucca ad blakady polskich haradoŭ. Adnak, buduć praciahvać manitorynh sytuacyi vakoł pieramovaŭ polskich mytnikaŭ i ŭradu krainy. Kiraŭnictva strajkavaha kamitetu «Biełastockaje parazumieńnie» i pradstaŭniki ŭradu abmianialisia ŭzajemnymi abvinavačvańniami, paviedamlaje hazeta «Dzieńnik». Tym nie mienš, častka mytnikaŭ vyjšła na pracu. Jak paviedamiła polskamu radyjo «Trojka» udzielnica «Biełastockaha parazumieńnia» Ivona Fołta, takim čynam mytniki chočuć zaśviedčyć svaju hatoŭnaść praciahvać pieramovy. Pavodle telekanała TVN24, siońnia ŭnočy na pierajeździe Karoščyn‑Kazłovičy pracavała paŭnavartasnaja źmiena mytnikaŭ. Ranicaj jaje źmianiła taksama cełaja hrupa słužboŭcaŭ. Za hety čas, pa infarmacyi telekanału, čarha źmienšyłasia z 14 da 2 kilametraŭ, a ŭsiaho było prapuščana kala 700 aŭto. Pavodle Marcina Čajki ź Biała-Padlaskaj mytnaj upravy, ciapier u Karoščynie čakaje na vyjezd z Polščy kala 200 aŭto, čas čakańnia składaje kala 8 hadzinaŭ. Sytuacyja na hetym pierajeździe ličycca adnoj ź lepšych na ŭschodniaj miažy Polščy.
Tym časam «Eŭrapiejskaje radyjo dla Biełarusi» pieradaje słovy načalnika pres‑słužby pamiežnaha kamiteta Alaksandra Ciščanki pra toje, što čarha na polskaj terytoryi składaje 45 km. Načalnik pres‑słužby padaje taksama inšyja ličby prapuščanych praź miažu aŭto: z 24 hadzin da 8 ranicy na «Kazłovičach» było prapuščana ŭ Biełaruś 280 hruzavych mašyn, u Polšču — 54.