Alaksandar Fiaduta: «Łukašenka pačynaje dyjaloh z Eŭropaj»
Palitolah pra sustreču A. Łukašenki z pasłom Niamieččyny Hiebchartam Vajsam.
«Nasamreč mienavita zaraz Alaksandar Łukašenka sprabuje naładzić adnosiny z Eŭropaj. I akurat z pasłom krainy, jakaja z usich zachodnieeŭrapiejskich krainaŭ najbolš lajalna stavicca da Biełarusi. Z pasłom, jaki dahetul pracavaŭ u Kazachstanie, i maje z čym paraŭnoŭvać. Jak, darečy, i minuły ambasadar Niamieččyny Marcin Chiekier, što pracavaŭ da Biełarusi va Ŭzbekistanie. Łukašenka faktyčna paskardziŭsia Vajsu na padvojnyja standarty, jakija prymianiajucca zachodnimi krainami ŭ dačynieńni da biełaruskich uładaŭ. Patłumaču: Zachad značna lepš stavicca da Nazarbajeva z Karymavym, čym da Łukašenki. I cenić Eŭropa ich za tuju ž stabilnaść, jakoj chvalicca i biełaruski prezydent — kantrolem za sytuacyjaj, baraćboj z narkatrafikam i h. d. Faktyčna jon davodzić, što nia horšy za svaich kalehaŭ i čakaje da siabie adpaviednaha staŭleńnia.
Nie zabyvajem taksama, što Łukašenka sustreŭsia z pasłom krainy, jakaja maje siońnia vyznačalnuju vahu ŭ Eŭropie. Našaj apazycyi ŭ dadzienym vypadku nia treba biehčy da inšych pasłoŭ, kab pažalicca, maŭlaŭ, Niamieččyna nie razumieje nas, nia viedaje, što robić. Vydatna niemcy ŭsio viedajuć i razumiejuć. A dyjaloh treba kamuści pačynać, i Łukašenka padrychtavaŭ dla jaho hlebu. Adzinaje, što daradcy jamu nie raskazali, što pierš čym sustrakacca z pasłom dziela abmierkavańnia takich pytańniaŭ, treba mieć za saboj padtrymku bolšaści hramadztva. A jon takoj padtrymki siońnia nia maje. Kab jaje zdabyć, treba rabić kankretnyja kroki».